Larsap-in Union Minister leh MP a kâwm

Governor Lt. Gen. Nirbhay Sharma chuan Ningani zan leh nimin khan Raj Bhavan-ah Union minister of state for Rural Development Sudarshan Bhagat leh Rajya Sabha MP Ronald Sapa Tlau a kâwm.

Larsap leh Union Minister hi Ningani zan khan an inkâwm a; Union Minister chuan Kolasib district-a Rural Development hnuaia hmalaknate a tlawh tih sawiin, "Hmalakna hrang hrangte a ṭha hle. Chu bakah Kolasib DC hoa official-te'n min lo dawnsawn danah ka lawm hle," a ti.

Larsap chuan, Mizoram chu state lian a nih loh avangin sorkar laipui ṭanpuina a mamawh nasa tih sawiin, "Ṭanpuina sum lo kal turte hi a hun taka dawn a pawimawh," a ti a; a hun taka sum dawn a nih theihna atan hian theihtawp chhuahpui turin Sudarshan Bhagat chu a ngen a ni.

Governor Lt.Gen. Nirbhay Sharma hi nimin khan Rajya Sabha MP Ronald Sapa Tlau nen an inkâwm a, Mizoram hmathlir leh hnathawh mekte an sawi dun.

Larsap chuan, Ronald Sapa chu Mizo ṭhalaite tihhmasawnna atana theihtawp chhuah zel turin a ngen a, "Kum rei lote chhunga Mizoram nasa taka lo danglam tur atan ṭhalaite hmanhmawh taka puahchah an ngai," a ti a; Mizoram tana theihtawp chhuahpuiah a sáwm.

Ronald Sapa Tlau chuan, Mizoram sorkar hmalakna hrang hrang bakah sorkar laipuia Mizoram hmachhawp tam tak kalpui mekte a tarlang a; chu'ng hmalaknaahte chuan a theihna záwna lo ṭang chhunzawm zel turin Governor a ngen a ni.