Thiamna hman ṭangkai a ṭul: PC Lalthanliana

Horticulture department hotute chuan, an minister PC Lalthanliana hoin nimin khan Horticulture directorate committee room-ah Quarterly Meeting an nei a; minister chuan, Horticulture tana pawimawh chu officer-te thiamna hman ṭangkai a nih thu a sawi.

PC Lalthanliana chuan, Horti-culture department hmalakna leh hlawhtlinna turin officer-te an pawimawh hle tih sawiin, "An inpekna leh an thawhrimnaah thui tak department hlawhtlinna a innghat a, hmalakna hlawhtlinna tur hian sum leh pai budget-a kan neih tam leh tam lohah a innghat ber lo a, kan budget pawimawh ber chu in thiamna hman ṭangkai a ni," a ti.

Horticulture Minister chuan, "Tuna kan kalphung leh tih dan aṭanga hmasawnna ke pên tur hian sum leh pai neih belh ai mahin, kan kalphung leh tih dan
ṭha tawk lote siamṭha a, kalphung
ṭha zawk, tih dan ṭha zawk kan zawn chhuah thiam a ṭul a ni," a ti.

Kut hnathawktute pawhin tih tak takna leh thawhrimna nen hna an thawh a ṭul thu leh sorkara innghah vek ringawt a ṭhat loh thu a sawi bawk.

Meeting-a tarlan danin, Horticulture department hian kum 2016-17 atan Mission for Integrated Development of Horticulture (MIDH) hnuaiah Central aṭangin cheng vbc. 27 an hmu dawn a, state matching share cheng vbc. 3 nen cheng vbc. 30.92 an hmu dawn a ni.

Kum 2016-17 chhungin NEC hnuaiah Mualkawi, Champhai district-ah thlai chi ṭha, natna hrik laka fihlim leh hrisel siam chhuahna tur siam tum a ni a; Saichhoh, Lunglei district-ah grape chi ṭha siamna leh citrus fruit chi
ṭha siamna din tum a ni bawk.

Nimina meeting-ah hian district hrang hranga Horticulture officer-te an tel a, parliamentary secretary K Lalrinthanga, secretary B Lalhmingthanga leh director R Zotawna te pawh an tel a ni.