Home Minister-in DNA laboratory a hawng

Directorate of Forensic Science Laboratory-a DNA laboratory bun thar chu nimin khan Home minister R Lalzirliana'n a hawng a; investigating officer-te puitu tur leh-khabu 'Investigators Guide' a tlangzarh nghal.

Home Minister chuan, India rama state 18 chauhin DNA laboratory an la neih thu sawiin, "Pawikhawihna chhuina atana misual hnuchhui nana DNA phai lama thawn vanga hun rei tak tak nghah a ṭul ṭhin chu DNA laboratory hawn thar avang hian a bo dawn a, misual hnu chhui pawh a awlsam phah dawn hle a ni," a ti.

Mizoramin DNA laboratory a nei chu Mizoram tan méllung pawimawh tak a tling tih sawiin R Lalzirliana chuan, "National Human Rights Commission duh dan anga taka Forensic Science Laboratory directorate puitlinga siam a ni tate hi sorkar rintlakzia lanna a ni," a ti a; Forensic laboaratory-a thawktute chu duhsak tlaka ram tan ṭhahnemngai taka thawk zel turin a fuih.

Mizoram Forensic Science Laboratory hi kum 2000-a din a ni a, Police department hnuaiah hun eng emaw chen a awm hnuin, March 2015 aṭangin directorate puitlingah hlankai a ni a; tunah hian forensic expert 14-te'n department hrang hrang pasarihah inṭhenin hna an thawk mek a ni.

FSL-ah hian kum 2015 chhung khan pawikhawihna hmun (crime scene) 110 an enfiah a, thubuai hrang hrang 1,060 leh chumiin a ken tel exhibit 5,256 an enfiah a a ni.

DNA laboratory hawn-naah hian minister Lalrinmawia Ralte, coun-cillor pahnih R Zomuanpuii leh K Lalhmingliani, DGP Thianghlima Pachuau, IGP Zorammawia, DIG (NR) LT Hrangchal leh Home addl. secretary Lal-biakzama te pawh an tel.