Union minister hlui Dr C Silvera a thi

Mizo zinga union minister awm chhun, Dr C Silvera (81), Tuikhuahtlang chu Inrinni zan khan lung ṭha lo avangin a thi a, nimin khan vui a ni.

Dr C Silvera hi kum 1935-ah a piang a, kum 1965-ah Lallawmzuali nen inneiin, fa pali an nei.

Dr C Silvera hian MBBS zir zoin Christian Hospital, Serkawna medical supe-rin-ten-dent hmasa ber a ni a, kum 1973 khan zirna sang zawk zir turin Australia-ah a kal a, kum 1976 aṭang-in Aizawlah clinic a hawng.

1977, April-ah politics zawmin Congress party-ah a lut. Kum 1984-ah Congress party ticket-in Rajya Sabha MP atan thlan tlin a ni a, kum 1989 leh 1991-ah Congress party ticket thoin Lok Sabha MP atan thlan tlin a ni. Kum 1994 khan Union minister of state for Health atan lak luh niin, Mizo zinga Union minister hmasa ber leh tun thlenga awm chhun a ni.

Dr C Silvera Health minister a nih lai hian India ram pumpuia naupangte hnena zenghri danna pek beihpui thlak a ni a, tun thlengin India ram pumah chhunzawm zel a ni. Minister a nih chhung hian Mizoram tan thil eng emaw zat a ti a, RIPANS leh Lungleia nursing school-te hi a hmalaknaa tihpuitlin a ni.

Kum 1995-ah ministry a inthlak a, Industry chantir a ni. Industry a chan chhung hian Bairabi-a Bamboo Chipping Plant dah dan tur ruahman fel a ni.

Dr C Silvera hi a luhai vangin a insawisel ṭhin a, February 19, 2016 khan a mit zai a ni a, March 23, 2016 aṭangin a ṭawng chhuak hlei thei lo a, a tukah MRI tih leh a ni. April 9 zan khan bual-ina a lut chu a chau chhunzawm a, chuta ṭang chuan harh chhuak tawh loin a thi ta a ni.