Health Minister Thanzara'n pâ ei vanga thite a tawrhpui

Health minister Lal Thanzara chuan, Mamita pâ ei vanga Sai-khuma te chhungkuaa mi pali an thi chu pawi a tih thu leh a tawrhpui thu a sawi.

New Delhi-a sorkar thil pawi-mawha zin mek Health Minister chuan, pâ ei vanga Saikhuma leh a nupui leh an fate pahnih an thi chu pawi a tih thu sawiin, "March 4, 2016 tlaia pâ ei vanga mi pali laiin nunna an chán hi a pawi ka ti tak zet a, he thil thleng ka hriat hian min tihhrehawm hle a ni," a ti.

Lal Thanzara chuan, "Mamit leh Aizawl lama Health department lama thawktute'n theihtawp an chhuah a; ni mah sela chhan theih loha an boral ta hi a vanduaithlakin a pawi ka ti tak zet a, Pathianin khawhar chhungte a awmpui tlat ka beisei," a ti.

Health department lamin mipui hnenah pâ ei a him leh him loh dante zirtirna an chhuah nghal thu sawiin, Minister chuan, tuna damdawi-ina enkawl mekte chu an ṭhat chhuah ngei theih nan duhsakna a hlân a ni.