KHAWTHLIR

Thisen pe

Inrinni khan Kulikawn branch YMA chuan Aizawl Civil Hospital-ah thisen unit 50 an pe a, a petute mipa 45 leh hmeichhia panga an ni. Mizoram College of Nursing chuan Evangelical Nurses Fellowship (ENF) Day pualin Civil Hospital-ah unit 26 an pe a, a petute hmeichhia 19 leh mipa pasarih an ni. Zemabawk North Bial KṬP pawhin Central KṬP blood donation calender angin Synod Hospital-ah 46 pein, a petute mipa 44 leh hmeichhia pahnih an ni.

Tlawngah tla hlum

Nimin tlai dar 4 vel khan Lalṭanpuia (49) s/o Hrangdailovi (49), Ramhlun Venglai chu Sairang bula Tlawng luiah a tla hlum. Thu dawn danin, Lalṭanpuia ruang hi a tlâk hnu rei vak loah hmuh a ni..

EU kum 40 lawm

Pachhunga University College (PUC) Evangelical Union kum 40 tlin chu Inrinni khan PUC-ah an lawm a, inkhawm urhsûn tak hman a nih bakah, ruai an ṭheh. Inkhawmah hian Upa LN Tluanga leh Upa Chhawnvunga ten thuchah an sawi.

Lok Adalat

Kolasib District Lok Adalat chu Inrinni khan District Court-ah anṭhu a; thubuai 14 ngaihtuahin, leiba ṭhìnna Rs. 7,000 hmuh niin, thubuai pahnih tihtawp a ni.

Minister-in tlawh

AH&Vety minister C Ngunlianchunga chuan April 8, 2016 khan Thenzawla AH&Vety farm a tlawh a, ran chaw chînna hmun tihchangtlun dan tur leh hmachhawp awmte a enfiah. Kum 2016-17 chhunga AH&Vety department-in Thenzawl farm-a hma thar an lakna tur survey nghal a ni a, ruahmanna chi hrang hrang an siam.

Lirthei chesual

Inrinni chawhnu dar 1:30 vel khan Mamit Hmunpui branch KṬP chuanna pik-up MZ/08 - 2865 chu Kawnpui thlen hma New Khamrangah a chesual a, mi 19 in hliam an tuar a, Kawnpui PHC panpui an ni. Pathum chu Aizawl Civil Hospital-ah refer an ni a, a bak zawng chu first aid pek an nih hnuah chhuahtir an ni. Hmunpui branch KṬP te hi Hortoki Goligal branch KṬP tlawh tura kal an ni.