UPC (NEI)-in zu zawrh leh lei phalna neite Rawngbawltua hman loh an rel

UPC (North East India) General Conference vawi 48-na, Multipurpose Hall, Mualpuia neih chu nizan khan a ṭiak. Inkhawmpui hian, zu zawrh phalna leh a lei phalna permit neite rawngbawltua hman loh leh permit nei lo tura kohhran mite ngen an rel.

UPC (NEI) Conference rorel inkhawm hi general superin-ten-dent Rev. Lalmalsawma Sailo-in a kaihruai a, General Secretary report leh Financial report ngaih-thlak a nih bakah, zawhna leh chhanna hun hman a ni.

Conference rorelnaah hian agenda pasarih an nei a; kum 2017-a General Conference chu Lunglei district-ah leh kum 2018-a General Conference chu Aizawl East district-a nghah an rel a; a hun atan April thla Pathianni vawi thumna an bituk. Vaihlo khapna dan, COTPA 2003 a hlawhtlin leh zual theih nana chak zawka hma la turin sorkar ngen an rel bawk.

UPC Conference-ah hian district hrang hrang - North Mizo-ram, Aizawl East, Lunglei, Chhimtuipui, South East Naga-land, Churachandpur, Chandel, Imphal, Central, Barak leh Tri--pura district aṭangin rorel palai mi 300 vel an tel. General hruaitu thar an thlang a; general superintendent atan Rev. Lalmal-sawma Sailo, general secretary atan Rev. R Lalrinsanga leh general treasurer atan Rev. Zo-hming-thanzama te an thlang.