Minister-in sikul thar a hawng

Aizawl North-III bialtu MLA K Sapdanga, minister chuan March 2, Inrinni khan a bial chhung Edenthar Venga sikul din thar - The Pathway School a hawng. He sikulah hian nursery aṭanga class VII thleng a zir theih dawn.

K Sapdanga chuan sikul a hawn tak chu sumdawnna atan ringawt ni lo, ram tana rohlu tur chher chhuahna a nih ngei a beisei thu sawiin, "Hetiang zirna in hlawhtling tak ni tur hawng theia ka awm hi ka lawm. He sikul hawn a nih theihna tura buaipuitu zawng zawng leh a thawktu zawng zawngte duhsakna sang ber ka hlan," a ti.

Zirna uar chhungkuaten an bial chhunga sikul an din chu lawmawm a tih thu sawiin Aizawl North-III Bialtu MLA chuan, "Sikul dintuten an tum an tihhlawhtlin ngei ka ring," a ti a, sikul chu a dintu leh a dinna hmuna chengte tan Pathian malsawmna a nih a rin thu a sawi.

School administrator Rita Vanlalchhanhimi chuan zirna ṭha hmu lote tan zirna pek an duh tih sawiin, "Chona a ni a, a dinna hmun tur tak niin kan hria a, kan duhthlan a ni," a ti.

The Pathway School hi Churachandpur, Manipur-ah hlawhtling taka kalpui mek niin zirlai 1,200 vel an nei. Smart classroom vek a nih dawn bakah ICSE curriculam an hmang dawn.