KṬP General Conference 2024 a ṭiak; Ruihhlo do kawnga hmalak an rel

KṬP General Conference vawi 60-na, Ngopa khelmuala February 29, 2024 zana ṭan chu nizan khan a ṭiak. Inkhawmpuiah hian ruihhlo do kawngah hmalak an rel.

KṬP General Conference-ah hian Ngopa Chhimveng Kohhran biak-inah Central KṬP leader Rev. Dr F Pachhunga kaihhruaiin rorel a ni a; Suangpuilawn leh Champhai Kanan Veng pastor bial KṬP aṭanga thu lut angin ruihhlo do kawngah KṬP anga hmalak an rel a ni.

Kum 2025-26 chhunga kumpuan thupui atan 'Zirna leh rawngbawlna' tih an thlang a; kum 2025-a thupui zir atan 'Aia upa zah' an thlang. Kum 2024 chhungin Youth Recreation Centre (YRC) puala budget siam leh an rel a; YRC pual, chhawmdawlna pual leh hospital charity fund pualin KṬP inkhawmah vawi khat ṭheuh thawhlawm lak khawm an rel bawk.

Kum 2028-a KṬP General Conference neihna atan Mamit an thlang a; kum 2024-25 CKṬP budget atan Rs 71,50,000 an pawm.

Kum 2024-2026 chhunga CKṬP hruaitu tur mi 25 an thlang chhuak a, mi 25-te aṭangin office bearer tur mi pali ruat leh niin, nizan inkhawmah khan hruaitu tharte chu Synod moderator Rev. R Vanlalnghaka'n Pathian hnenah a hlan.

Report-a a lan danin, kum 2023 chhung khan KṬP member mi 552 an thi a, chu'ng zinga mi 484 (87.68%) chu mipa niin, mi 68 (12.32%) chu hmeichhia an ni. Mipa thi zat hi mipa member zat aṭangin 0.46% a ni a, hmeichhia thi zat chu member hmeichhe zat aṭangin 0.10% a ni thung.

Inrinni zan inkhawm aṭangin inkhawmpui speaker Rev. Dr H Vanlalruata'n Pathian thuchah a sawi a, thupui chu 'Mi dang tana malsawmna' tih a ni. Nizan khan CKṬP leader kal chhuak Rev. Dr F Pachhunga'n thuchah a sawi.

Thu dawn danin, KṬP General Conference-ah hian nimin dinhmun angin counter-a palai inhriattir zat chu mi 25,538 an ni a, inhriattir lo eng emaw zat an awm. Mikhual thleng tam berin mi 260 a thleng a ni.

KṬP STATISTICS 2023
1. Pastor bial zat - 217
Mizoram chhungah - 202
Mizoram pawnah - 15
2. KṬP branch zat - 904
Mizoram chhungah - 859
Mizoram pawnah - 45
3. Member zat - 1,71,404
Mipa - 1,04,736
Hmeichhia - 66,668
4. Member tamna ber bial
- Champhai Vengthlang bial (2,442)
5. Member tamna ber branch
- Mission Veng branch (1,463)
6. Branch ding thar - 4
7. Sum hmuh zat - Rs 93,66,540
8. Member thi zat - 552
Mipa - 484
(87.68%)
Hmeichhia - 68
(12.32%)
9. KṬP member nupui/pasal nei - 3,460
Biak-inah - 1,541
(44.54%)
Hmun dangah - 1,919
(55.46%)
10. Inkhawm zat chawhrual - 38,188.86
(22.28%)