Chief Minister leh ONGC Director-in Gas lak chhuah dan tur an sawi dun

Chief minister Lalduhoma chu March 2, Inrinni khan a chenna-in, CM Bangla-ah Oil and Natural Gas Corporation (Exploration) director Sushma Rawat leh a thawhpuiten an kawm a; Mizoram hmun ṭhenkhatah lei chhung aṭanga gas irhchhuak a awm thu leh hmalak dan tur an sawi dun.

Sushma Rawat chuan Meiduma gas an hmuhchhuah tawh chu a lakchhuahna tur hmun ṭha, hmun hnih hmun thumah an thlang fel tawh tih a sawi a, "Nimahsela, heng hmuna kan khawlte lakluhna turin Chhimluangtê luiah Mizoram sorkarin lei (bridge) a dawh mek a, hnathawh a muang avangin kan duh hunah hna kan ṭan thei lo," a ti a, lei dawh hi hmanhmawhsak turin Chief Minister a ngen.

Mizorama tuialhthei/gas lakchhuah hunah Mizo ṭhalai geology lama thiamna neite tan hna a tam dawn hle niin Sushma Rawat chuan a sawi a; Chief Minister chuan Mizo ṭhalaite geology zirna lam uar tura ngenin, sorkarin geology zirna hmun pawh a theih anga tihlen dan a ngaihtuah tur thu a sawi.

ONGC Director chuan Mizo ṭhalaite'n geology lam zirna an uar theih nan a ṭul anga Mizoram sorkar thawhpui an inhuam thu a sawi a; an sum leh pai senga zirlaite tana field trip buatsaih te, zirlaite hnena training/interaction rawn pek te leh Dehradun-a ONGC Institute lama practical exposure buatsaihsakte pawh an inhuam thu an sawi a ni.

Chief Minister leh ONGC Director chuan Mizoram hmun ṭhenkhata gas irhchhuahna (seepage)-te hi a rang lama tlawh chhuaha, zirchianna neih thuai ni se, an ti.

Chief Minister chuan Mizorama gas/oil irhchhuahna hria apiangte'n a awmna khua, lirthei kal theih chin aṭanga a hlat zawng, a thalak/ video tawi leh thil ṭuldang awmte ama social media kaltlangin emaw, whatsapp number 8730970574-ah emaw, email - cm@mizoram.gov.in ah thawn turin mipuite a ngen.

ONGC Director hi Director General of Hydocarbons Dr Pallavi Jain Govil-in a ṭawiawm.