House-a ZPM minister leh MLA-te chet danin mipui nuih a ti za - MNF

MNF chuan thuchhuah siamin, Mizoram Legislative Assembly Session neih mekah ZPM minister leh MLA-te'n mipui nuih an tiza niin an tarlang.

MNF chuan session neih meka ruling party-te khawsak dan chuan mipui nuih a ti zain beisei a bo hleah an ngai tih tarlangin, "House zahawmna an tihniamin an che nawi hle. ZPM MLA ṭhenkhat House-a kuhva lo ṭhial nuau nuau te, minister bengek lo hawlh mawlh mawlhte hmuh tur an awm. Speaker zahawm tak MLA-in dan an han hrilhfiah a, an han inhnial zuite kha House-a thil hmuh tur vang tak a ni," a ti.

Member ṭhenkhatin health care bill chungchang Health Minister an zawhna, Health Minister-in chhan theih a nei miah lo tih tarlangin MNF chuan, "House Leader chhang tura a ti ringawt maite kha a mak hle. House Leader-in a chhan deuh ngai Minister hi chu an awm zeuh zeuh ṭhin," a ti a, zawhna pumhlum chhan theih loh tawp chu House-a a thlen vawikhatna nia a lan thu an tarlang.

MNF tarlan danin, sorkar aṭanga bill lut, minister pakhatin a han hnial kalh chiam mai chu thil thleng ngai lo, ama sorkar ngei rintawk lohna lantirna dik tak a ni.

Eptu MLA-te chu House zahawmna vawnhim kawngah leh an mawhphurhna hlen kawngah an fakawm. Leader of Opposition kaihhruaina hnuaia sorkar khalhngil kawngah leh sorkar kallai thlawp an ṭul hunah thlawp kawngah a nachang an hriain, an thawhrimna a chhuanawm hle.