Wine, beer, heroin leh ganja man

March 1-2, 2024 khan Assam Rifles, police leh Custom department ṭangkawp chuan hmun thumah foreign wine, foreign beer, ganja leh heroin an man.

Assam Rifles leh Special Narcotics Police, CID (Crime) ṭangkawp chuan March 2 khan Vaivakawn, Aizawlah Lalhriatpuia, Bung Bangla, Zemabawk nia inchhal hnen aṭangin ganja kg. 49.572 an man. Thubuai ziahluh a ni.

Zokhawthar Police, Assam Rifles leh Custom dept. ṭangkawp chuan March 1 leh 2 khan hmun hnihah foreign wine, foreign beer leh heroin an man.

Heroin chu Vanneihthanga (34), Dungtlang nia inchhal hnen aṭangin gram 814 man a ni a, a phurhna motor santro car MZ/01 G - 2508 pawh hrensak nghal a ni. Vanneihthanga lakah hian Zokhawthar Police-ten thubuai an ziak lut.

Foreign wine leh foreign beer hi Zokhawthar leh Hmunhmelṭha inkar leihlawnah man a ni a, a vaiin case 200 a ni.