MBJP-in MP inthlan campaign an ṭan

Mizoram BJP chuan March 2, Inrinni khan Lok Sabha MP inthlan lo awm tur atana campaign bulṭanna hun Mission Veng Bazar-ah an hmang.

MBJP president Vanlalhmuaka chuan BJP chu party mal khai chuan khawvel pumah party lian ber an nih thu sawiin, "Prime minister Pu Narendra Modi ngei pawh hi tunah hian a hnathawh ṭhat avang hian khawvel prime minister ang hiala sawi a ni," a ti.

MP inthlan lo awm turah BJP chu seat 370 la tura an inbuatsaih thu sawiin Vanlalhmuaka chuan, "India hmarchhaka MP-te'n an state mamawh hrang hrang an dilchhuak thei," a ti a, Mizoram pawhin MP awmze nei, Mizoram mamawh sawichhuak thei a neih a ṭul thu a sawi.

MBJP President chuan Mizoram hian India hmarchhakte angin union minister kan nei ve thei tih sawiin, "Hmarchhak state MP-te union minister an awm ta nual mai, chutiang ang chu Mizoram ah pawh MP kan nei ve thei. Chu BJP MP chuan Mizoram sum leh pai a harsatna lak ata chhanchhuah na turin apawimawh hle dawn," a ti.

Vanlalhmuaka sawi danin, budget piah lamah BJP leh a thawhpuite sorkarna state-a an tih angin, Mizoram tana central hruaituten kan budget khawih buai miah loa sum min pek an tum chu cheng vbc. 30,000 chuang a ni.

Pawisa hi haichhuak tur chuan a chahbi neitu chu BJP a ni a, Mizoram a sum leh paia kan harsatna sutkian pui turin BJP MP Mizoramin kan mamawh a ni.

Thusawitu dang BJP MLA Dr K Beichhua chuan Mizoram BJP an hmuh dan a hniam tih sawiin, "Keini state rethei tak thawhchhuah mumal tak nei lo hian central malsawmna kan dawn theihna turin a chahbi kan lo insiam ve a ngai," a ti a, MP inthlan lo awm turah BJP candidate vote turin mipuite a sawm.