KHAWTHLIR

Assembly Session

February 19, 2024 aṭanga neih ṭan Mizoram Legislative Assembly Budget Session chu sorkar chawlh a nih avanga ni thum chhung chawlh a nih hnuah vawiin chawhma dar 10:30 aṭangin ṭan a ni leh dawn.

Thisen pe

March 2, Inrinni khan ṬKP, Aizawl Central Pastor Bial chuan ZMC tan thisen unit 55 an pe a, petute mipa 33 leh hmeichhia 22 an ni. Fundamental Baptist kohhran ṭhalaite pawhin an din champha vawi 39-na pualin Civil Hospital, Aizawl tan thisen unit 21 an pe a, petute mipa 15 leh hmeichhia paruk an ni.

MLA-in kawm

South Tuipui bialtu MLA Jeje Lalpekhlua chuan March 2, Inrinni khan a bial chhung Denglung khua a tlawh a; village council, tlawmngai pawl leh political party hruaitute a kawm. Denglung khawtlang leh a bialah hmasawnna hna thawh tur a awm dawn tih sawiin, "Hna ṭha taka thawh tur a ni a, hna ṭha lo a awm thiang lo," tiin, uluk taka an vil dawn thu a sawi.

MLA-in tlawh

March 1, 2024 khan Tuichang bialtu MLA W Chhuanawma, dy. chief whip chuan a bial chhunga Khawzawl Tourist Lodge, 2nd IR Battalion leh NH-06 (Old Road, Tuisenphai to Chhumliam kawn) te a tlawh a, official-te nen hmalakna tur hrang hrang an sawiho.

Chenna in kang

March 2, Inrinni zan dar 6:45 vel khan Mualkawi, Champhai district-a Bawihliansanga chenna in, Assam type chu bungraw chuh hman loin a kang. Bawihliansanga hi amaha cheng niin, a in awmna hi a fal deuh a, in a kan lai hian a inkhawm avangin in kan chhan hi hriat a ni lo.

Science Day

Lunglei Science Centre (LSC) leh Mizoram Science Technology and Innovation Council (MISTIC) ṭangkawp chuan March 2, Inrinni khan Lunglei Zohnuaia Science Centre Auditorium-ah National Science Day, 2024 an hmang a, thupui chu ‘Science with fun’ tih a ni. He hunah hian Lunglei Government College-a department of Chemistry zirlai naupangte leh Jawahar Navodaya Vidyalaya School, Pukpui zirlai naupangte an tel.