Mipui tana hmalakna politics thilah Hman tangkai tur a ni lo: Governor

Larsap Lt.Gen. Nirbhay Sharma chuan, nimin khan Aizawl Municipal Corporation (AMC) leh UDPA department hotute Governor conference hall-ah a kâwm a; Aizawl khawpui tihhmasawnna tura ruahmanna an kalpui mekte leh hmachhawpte a zawt a, mipui tana hmalaknate chu party politics thila hman ṭangkai tur a nih loh thu a sawi.

Governor chuan, AMC leh UDPA department-in Aizawl khawpui hmasawnna tura rua-hmanna an kalpui mekte chu lawmawm a tih thu a sawi a, "Aizawl Master Plan-in a tak ram a thlen theihna atan leh Aizawl khawpuia lirthei tlan dan felfai taka siam, bawlhhlawh dahbo leh sawngbawl dan hrisel zawk leh khawpui chhunga chenna in sak dan kalphung felfai zawk kalpui a nih theih nan AMC-in thawh tur tam tak a nei a, tun aia nasa zawka department-te nen an inbiak pawh a ngai a ni," a ti.

AMC chu India rama munici-pal corporation ṭha ber ni thei a nih thu sawiin Larsap chuan, "Khawpui chhunga in sak dan felfai zawk ruahmanna leh khuahkhirhna kenkawh chung-changah AMC-in State Disaster Management Authority râwn nacháng an hriat a pawimawh," a ti a; Aizawl khawpuia chenna in tinte chu a chhunga chengte leh mi dang tan a him tawk em tih tih disaster audit hmanga endik a ngaih thu a sawi.

Larsap chuan, AMC hotute chu Aizawl khawpui tihthâwlna atana ruahmanna siam turin a chah a, "Tun aṭanga hmalak a nih loh chuan kum rei lote chhungin Aizawl hi chenna tlak loh khawpin a tâwt ang a, lirnghing bakah khuarêl chhiatna hrang hrang lakah tun aia a let tam takin a him lo zawk dawn. Aizawla hmalakna reng reng chu Aizawl Master Plan en chunga kalpui zel a pawimawh telh telh dawn a ni," a ti.

Meeting-ah hian AMC mayor PC Lalhmingthanga, deputy mayor Lalringliana, Aizawl DC Kannan Gopinathan, AMC commissioner Dr H Lalthangliana leh UDPA department hotute an tel a ni.