CYMA hruaitute'n Chin state-a Lei min tuarte an tlawh kual

Central YMA hruai-tute chuan president Lalbiakzuala hoin tun hnai khan Myanmar Chin state chhunga lei min tuarte tana relief camp siam an tlawh a; YMA kaltlanga Mizo mipuite sum thawh khawm hmanga in sakte enin, thil pawimawhte an sawipui.

CYMA hruaitute hi kaltlanga Myanmar tui-lian tuar ṭanpuina an pek avanga lawmthu sawi nan Myanmar sorkara Sagaing Division leh Shalom Youth Committee, Tedim-te chuan lawmthu sawina thiziak an lo hlan a; YMA thuchhuah chuan, "YMA hian Mizo hnam inpumkhat nan leh Myanmar-a Zo hnahthlak unaute nena inzawmna ṭha a awm theih nan a ṭul angin hma a la zel ang," a ti.

CYMA hruaitute hi Tahan-a Chapchar Kût an hmanpui a; chumi pah chuan Myanmar rama Mizo hnahthlak, tuilian tuarte CYMA hminga
ṭan-puina lo pek tawhte an tlawh kual a, chung zingah chuan Khampat, Kanan leh Myohlah khuate a tel. YMA hruai-tute hi Tahan-a Mizo pawl hruaitute nen pawh inkâwmin, hnam inpumkhatna lam hawi leh inpuih tawn zel theih dan turte an sawiho a ni.

CYMA chuan, April 5, 2016 zana thli leh rial thawkin a tihchhiat Tualcheng khuaa in 157 leh Lungphunlian khua-a in 74-te chu CYMA finance se-cretary Lalrochuanga Pachuau hoin CEC eng emaw zatin a hmunah an kan tih an tarlang a; chhiat tawkte chu silpauline-te an pek bakah, hnatlangte thingpui lumna senso atan sum an pek thu an tarlang bawk.