KHAWTHLIR

IPS kaisang

Mizo IPS officer pahnih, LH Shanliana leh John Neihlaia-te chu tun hnai khan an kaisang. LH Shanliana chu IGP-ah a kaisang a, John Neihlaia chu DIG-ah a kaisang thung. An pahnih hian Arunachal Pradesh-ah an awm a ni.

Kawng zawh

Tuipanga MCHP leh MHIP te chuan an hmeichhiatpui hliamna tak a tuara sawisak a nih duh loh lantirna atan nimin khan kawng an zawh. Thudawn danin, K Lalramnunngaia (21), Tuipang chuan nula pakhat a nupui ram kal damlo enkawlpui tur anga sawmin, a hruai chhuak a, thlanmualah pawngsual a tum a, nula hi a ṭan ve avangin nikhaw hre lo khawpin a rek a, a kalsan a ni.

College-ah workshop

Govt. Aizawl North College chuan nimin khan an college-ah Choice Based Credit System chungchangah workshop an buatsaih a, MZU-a lecturer Dr. Lalbiakdiki Hnamte-in thil pawimawh hrang hrang a sawi.

Tui pump

Greater Lawngtlai Water Supply Scheme (GLWSS) aṭangin Pathianni aṭang khan diesel engine hmangin tui pump ṭan a ni a, mipui hnenah sem a ni. GLWSS chu kum 2011-a siam ṭan a ni a, cheng vbc. 25.64 sên a ni.

Tobacco clinic

Serchhip District National Tobacco Control Programme (NTCP) hnuaia Tobacco Cessation Clinic (TCC) chu nimin khan JN Hospital-ah hawn a ni. Clinic hi zûk leh hmuam sim duh tan pan theih a ni a, damdawi leh counselling hmangin zûk leh hmuam sim duhte ṭanpui ṭhin an ni ang.

Heroin man

Central YMA hnuaia SRS-te chuan Pa-thianni zan khan Aizawlah heroin hawng khat, can kua leh chhìn sen thum an man a; AP mum 55, Addnok mûm 20 leh ganja an man bawk. Ruihhlo kaihhnawiha mi pahnih an mante chu home-ah dah an ni.