MSHCS-a inziak lut turin sáwm Covid-19 veite inenkawlna a huam
Mizoram State Health Care Scheme (MSHCS) hnuaiah October 1, 2019 aṭanga September 20, 2020 thleng khan cheng vbc. 35.77 pek chhuah a ni. Health minister Dr R Lalthangliana chuan, MSHCS-ah inziak lut vek turin mipui a sáwm a, Covid-19 veite inenkawlna pawh a huam tawh thu a sawi.
MSHCS chungchangah Health Minister hian nimin khan a pisaah thuchah a sawi a, "MSHCS hi kum 2008-a ṭan niin, MNF-in sorkarna a chan leh hnuah natna zawng zawng bill theih tura duan nawn a ni a, kan Chief Minister a thawh hlâwk hle. Kalphung duan thar October 1, 2019 aṭanga hman ṭan aṭangin September 20, 2020 thleng khan damlo bill 12,605 lutin, cheng vbc. 35.77 pek chhuah a ni," a ti.
Kum 2020-21 atan tunlaiin MSHCS-ah inziah luh hun hawn mek a nih thu sawiin R Lalthangliana chuan, "Inziak lut lo tan bill theih a ni lo. Mi tam tak a hun laia inziah luh ngaihsak lo, harsatna an neiha buai leh si an awm ṭhin. Chuvangin, a hun lai hian ngaihsak ṭheuh ang u," a ti a; sorkar hnathawk leh sorkar hnathawkin an chenpui, sorkara MR a bill sak theihte tan erawh chuan inziah luh phal a nih loh thu a sawi.
Health Minister chuan, MSHCS hnuaiah chhungkaw pakhatin kum khat chhung atan an inenkawlna senso Rs. 2,00,000 thleng hmuh let theih a ni tih sawiin, "Natna zawng zawng deuh thaw a huam a, zu leh damdawi hman sual kaihhnawih thlengin a huam. Mizorama sorkar leh private damdawi-in zawng zawng bakah, phai lama inenkawlna atan hman theih a ni," a ti.
Dr R Lalthangliana chuan, kum 2020-21 atana inziah luh hun chu December 31, 2020 thleng hawn a nih thu sawiin, "Inziah man bithliah chu BPL chhungkaw tan Rs. 100 a ni a, a bak zawng tan Rs. 1,000 a ni," a ti a; mahni khua/venga Health sub-centre ṭheuh bakah, VC/LC-te ruahmanna siamah inziah luh theih a nih thu a sawi.