Oil palm MT 9215.05 hralh chhuak tawh

Agriculture (Crop Husbandry) department chhinchhiah danin, Mizoramah oil palm chîn theihna ram hectare 1,01,000-a zau a awm laiin, hectare 23,358-a zauah chauh la chîn a ni a; oil palm chîngtu chhugnkaw 10,843 awm tawhin, kumin January thla thleng khan metric ton 9215.05 hralh chhuah a ni tawh.

Agriculture department hian Mizorama kut hnathawktute hnenah oil palm ṭiak 33,79,300 an sem tawh a; oil palm chînna khua 225 awmin, Champhai district tih loh district dang zawngah chìn a ni tawh. Kumin January thla thlenga metric ton 9215.05 an hralh chhuah tawh chu kg. khat Rs. 5.50 hisâpin company-in an lei a, hralh chhuahna man zat chu cheng vbc. 4.70 hû a ni.

Agriculture (CH) director Dr C Lalzarliana chuan, oil palm chu hriak nei thlai zinga thar hlâwk ber nia sawiin, "Thla khata nuai khat chuang hralh pawh an awm mek a, Mizo pa rílrem zawng tak niin, kum thum a tlin-ah a rah ṭan a, kum 25-30 thleng hlâwk takin a thar thei a ni," a ti.

Dr C Lalzarliana chuan, oil palm chìnna hmunah a rah hmain thlai dang pawh a chìn theih tih sawiin, "Kângmei a haw ve lo a, a tám ve ngai lo hi a ṭhatna a ni. Thlai dang angin khârchhâwng an awm lo a, oil palm chíngtu leh a leitu company-te an indáwr ṭhin. Hralhna tur lama buai ngai awm lo hi chîn uar phahna tham a ni," a ti a; oil palm chu Mizoram economy siam danglam thei khawpa ṭha a nih thu a sawi.

Oil Palm huan neitu Zomuansanga, Lower Zarkawt chuan Kolasib district-a Khamrang ram, Tuitun Zauah Oil palm an ching a. An huanah hian kung 5000 chuang an phun a, heng zingah hian kung 3000-4000 vel a dam tih a sawi. Tunah hian kung 2000 vel a rah tawh. Kum 2012 vel
aṭang khan oil palm an thar ṭan a, kum khatah quintal 1500-1800 vel an thar chhuak. Kg khat Rs 5.50 hisapin an hralh ṭhin. Hei hi Rs nuai 8-10 vel a ni. Hei hi a rah hun leh hmin hun inang lo. "Kg khat Rs 5.50 chuan a hlawk nep deuh, a man hi tun hnaiah an tisang dawn niin ka hria a, a ziaawm deuh ang" a ti. Ṭha taka enkawl a ngai a, a hmun samfai loh chuan a rah leh zung hi ramsa in an duh em em a, a zuva duh niin a sawi. June leh October thla inkar hi a rah tam vanglai a ni. Tui pek ṭhat chuan a thar kumtluan reng thei a ni a ti.

A enkawl a hautak, a rah lakkhawm a buaithlak chuvangin kawng bul hnai emaw lirthei luhtheihna ramah chin a ngai tih a sawi.

Agriculture department chhin-chhiah danin, kum 2012 aṭanga January 2016 thleng khan oil palm rah hralh tam ber chu Nâlzáwla oil palm chíngtu Ramtinchawma a ni a, kg. 7,16,264 a hralh a, a hralhna aṭangin kum li chhungin Rs. 39,39,452 a hmu a ni.

Oil palm hralh tam dangte chu - Thanzauva Chhakchhuak-in kg. 3,26,017 hralh tawhin, Rs. 17,93,093 a la lut tawh a; Zomuan-sanga'n kg. 2,38,251 hralhin Rs. 13,10,380 a hmu tawh. Vanlal-thawm-a Pachuau-in kg. 2,24,844 hralhin, Rs. 12,36,642 a la lut tawh a; Zohmingliana'n kg. 1,90,986 hralh--in, Rs. 10,50,423 a hmu tawh bawk.

Mizoram hi India hmarchhak biala oil palm uar ber state a ni a, kum 2004-05 aṭang khan chìn
ṭan a ni. Oil palm chîn leh hralhna kawnga buai loh nan Mizoram sorkar chuan company pathum thawhhona thuthlung (MoU) a ziahpui tawh a ni.

Mizoram sorkarin MoU a ziahpuite

Company Thawhna bial MoU Ziah Ni

1. Godrej Agrovet Ltd. Kolasib & Mamit September 14, '05

2. Ruchi Soya Industries Ltd. Lunglei & Lawngtlai October 3, '06

3. 3F Oil Palm Agrovet Pvt. Ltd. Serchhip, Aizawl & Saiha March 7, '06