MADC hnathawkte'n lungawi lohna Lantir chhunzawm zel an tum

Six-Pay Arrear pek kim phuta nuar mek, Mara Autonomous District Council (MADC) hnathawkte chuan ni thum chhung casual leave an la tawh.

Thudawn danin, MADC hnathawkte hi an thil phut chungchangah hian nimin tlai thleng khan MADC hotute nen an la inbe loa, chuvangin lungawi lohna lantir hi chhunzawm zel an la tum. An thil phut chung-changah thu lawmawm an hmu lo zel a nih chuan April 18 aṭangin tiam chin awm loa lungawi lohna lantir an tum a ni.

MADC hnuaia hnathawk mi 1800 vel zinga 1580 vel chuan Six-Pay Arrear dawng thei turah an in ngai a, hei hi pek an nih chuan sum mamawh tur chu cheng vbc. 13.57 a ni. Six-Six Pay Arrear hi cheng vbc. 7.6 pek chhuah a ni tawh a, la pek chhuah loh vbc. 6.50 vel chu hnathawktute chuan MADC-in NITI Ayog aṭanga an dawn cheng vbc. 7.64
aṭanga pek an ngen a ni.

MADC chuan NITI Ayog atanga sum hmuh chu 'Untied Fund' ni mah se, hmasawmna hna thawhna atana hmang tura Planning department-in a tih avangin kawng dang-ah an hmang thei lo niin an sawi a, heti chung hian Six-Pay Arrear pek tur la awm aṭanga 20% chu pek theih dan ngaihtuah an tum thu an sawi.

MADC hotute chuan arrear an pek har avanga lungawi loh thu High Court-a thlen chu hnuk kir turin hnathawktute hi an ngen a, hnuhkir a nih loh chuan thil tih ngaihna a awm loh thu an sawi.

Mahse hnathawktute chuan High Court-a lung-awi loh thu thehluttute chu anmahni ni loin, opposition MDF member Lawbei niin an sawi a, "Hnukkir tura an phut theih kan ni lo. Arrear la bang hi mi pe se, High Court thubuai hi a tawpzui ve nghal mai dawn a ni," an ti.