Covid-19: Mizoram dinhmun Niminah 50 chhuahtir an ni
October 5, Thawhṭanni khan Mizoramah Covid-19 vei mi pariat hmuh chhuah a ni a, state páwn aṭanga rawn lut vek niin, Mizoram chhunga kái chhâwnga ngaih an awm lo. Nimin khan hripui vei tawh lo mi 50 chhuahtir an ni thung.
Thawhlehnia hripui vei hmuh chhuahte chu - ZMC laboratory-a hmuh chhuah mi pali, Kolasib District Hospital-a hmuh chhuah pathum leh Serchhip District Hospital-a hmuh chhuah pakhat an ni a; mipa vek niin, Covid-19 symptom nei an awm lo.
Nimina mi 50 chhuahtirte chu SRH-ZMC aṭangin pakhat bakah, CCC hrang hrang - Serchhip Nursing School aṭangin 36, Monfort School aṭangin panga, Champhai leh Lawngtlai aṭangin pahnih ve ve, Darlawn, Mamit leh Thingdawl aṭangin pakhat ṭheuh leh home isolation-a awm pakhat an ni.
Mizorama Covid-19 vei hmuh chhuah tawh chu mi 2,128 an ni a, mipa 1,761 leh hmeichhia 367 an ni. An zinga mi 1,887 (88.67%) an chhuak tawh a, enkawl mek mi 241 (11.33%) an awm. La chhuak lo zingah hripui vei tawh lo an awm nual bawk.
October 5 khan ZMC laboratory-ah mi 364-te swab sample endik aṭangin Covid-19 positive mipa pali hmuh chhuah a ni a, Assam Rifles sipai pathum leh BSF sipai pakhat an ni. An vaiin tun hnaia Mizoram páwn aṭanga rawn lut, anmahni quarantine facility-a inkhung hrang lai niin, Covid-19 symptom nei an awm lo.
Sorkar thuchhuah tarlan danin, Kolasib District Hospital laboratory-ah TrueNAT-PCR hmangin Thawhṭanni vêk khan hripui vei mi pathum, mipa vek hmuh chhuah a ni a; kum 22-36 inkar, Assam aṭanga haw pahnih leh Sikkim aṭanga haw pakhat niin, quarantine facility-a awm lai an ni.
Serchhip District Hospital-ah pawh TrueNAT-PCR hmangin Covid-19 positive mipa kum 21 mi hmuh chhuah a ni a, Thenzawla Tribeni Construction Ltd. hnuaia hna thawk, tun hnaia Assam aṭanga rawn lut niin, Covid-19 symptom a nei lo.
October 5 khan ZMC laboratory-ah swab sample 364, TrueNAT-PCR hmangin district pangaah sample 89 leh RAT hmangin district pariatah sample 420 endik a ni a, a vaiin 873 a ni.