Leiminin in pathum a hnâwl

Nimin tlai dar 3 vel khan Zemabawk Kananthar Venga petrol pump bulah kawng chhak aṭangin lei a min a, in pathum leh lirthei pahnih kawng thlangah a hnâwl a, in pakhat chu a chim.

Vanglaini thu dawn danin, leiminin in a hnâwl pathum zinga pahnih chu luahtu an awm loh lai a ni a, pakhat chu chhungkaw pahnih luah lai a ni thung a, leimin laiin inah an awm lo. In pathum zinga pakhat, RCC building chu a chim zui a; lirthei a hnâwlte chu city bus leh Maruti car pakhat ve ve a ni.

Nimin tlai khan leiminna báwr vela awm in pakhat, chhung­kaw pasarih luah lai chu hlauh­thawnawma ngaih a nih avangin bungruate thiar chhuah a ni.

Leimin hian National Highway kawngpui a hnawh ping vek a, lirthei tan kal tlang theih a ni lo. Aizawl leh Tuirial inkara kal tlang turte tan chuan Zokhawsang lam aṭanga hêl a ngai a ni.

Leiminna hmun hi nimin tlai khan bialtu MLA Zoramthanga, chief minister chuan tlawhin, hmalak dan tur a enfiah a, local council hnenah Rs 20,000 a hlan