Hmun dang ruala inthlan theih lohna V/C 31-ah May 19-ah inthlang dawn

April 2015-a village council inthlanna neih theih lohna khaw 31, Aizawl district-a khaw 25 leh Kolasib district-ah khaw parukah May 19, 2016 khian inthlan buatsaih a ni dawn.

State Election Commission (SEC) chuan, invauna a awm vanga Mizoram hmun dang ruala inthlan theih lohna khaw 31-a V/C inthlan chu May 19-a neih a nih tur thu nimin khan a puang.

SEC-in ruahmanna a siam dan chuan, inthlan chuh tumte tan April 26, 2016 thleng hming pek thei a ni a, April 27-ah hming pek luhte endik an ni ang a, April 20 chhun dar 12 thleng inhnuhdawhna hun hawn a ni ang. May 19-ah zing dar 7 aṭanga tlai dar 4 thleng vote thlak tur a ni a, vote thlak zawh veleh vote tlate chhiar nghal a ni ang.

Inthlan puan a nih tak avangin Model Code of Conduct chu nimin aṭang khan hman nghal a ni a; hei hian Aizawl leh Kolasib district-a inthlanna tur khaw awmna constituency-te a huam dawn a ni.

V/C thlanna tur khuate chu - Aizawl district-ah Dáido, Damdiai, Khawlian, Khawpuar, Làmherh, Lungsum, Mauchâr, N. Khawdungsei, North Khawlêk, North Ṭinghmun, NE Tlangnuam, New Vervek, Palsang, Phuaibuang, Ratu, Sailutàr, Sakawrdai, Suangpuilawn, Sunhluchhip, Thingsât, Vaitin, Vanbawng, Záwngin, Zohmun leh Zokhawthiang-te a ni. Kolasib district-ah chuan Saipum, Saiphai, N. Hlimen, Phainuam, N. Chawnpui leh Saihabui-V te a ni.

Mizoram district paruka V/C-te leh local council-te term ding lai chu April 30, 2015 khan a tawp angin, inthlan ve theih lohna khaw 31-a V/C ding laite term pawh a tàwp ve nghal a; Mizoram sorkar chuan The Lushai Hills District (Village Cuncils) Act 1953 tlawhchhanin, khaw 31-a V/C ding laite a ṭhiat nghal.

Inthlan theih lohna khaw 31-te chu felfai taka inthlanna buatsaih theih a nih hma chuan Aizawl leh Kolasib district-a DLAO (Local Administration Officer)-te'n an enkawl a; ni tina V/C-te inrêlbâwlna kawnga tih tur ṭulte chu field inspector leh assistant field inspector-te'n an kengkawh a ni.