Hna thawk loa sum hmuh tumte Sorkarin a ngaithei lo: Minister Zira

Champhai leh Khawbung RD Block-a Mizoram State Rural Livelihood Mission (MzSRLM) kalpui tur chu nimin khan Champhai Venglai YMA Hall-ah hawn a ni a; a hawngtu, Rural Development minister R Lalzirliana chuan, sorkarin hna thawk loa sum hmuh tumte a ngaihtheih loh thu a sawi.

MGNREGA sensitisation programme ni bawk inkhawm-ah hian R Lalzirliana chuan, MzSRLM chu self help group (SHG) din a, pawl hmanga eizawnna ngêlnghet siamsak a, awmze nei taka sum leh pai hman dan inzirtira din chhuahna kawng kawhhmuh tumna a nih thu a sawi a, "Kutdawh rilru pua thawk loa sum hmuh tum chu sorkarin a ngaithei lo. Thawhrimna tel loin hlawhtlinna tak tak a awm thei lo," a ti.

RD Minister chuan, miretheite chawi kâng turin sorkarin theihtawp a chhuah tih sawiin, "BPL nih hi thil zahthlak a ni tih hria a, BPL nihna aṭanga zuang chhuak turin taima tak leh rinawm takin thawh a ṭul," a ti a; MGNREGA leh mipui tihhmasawnna tura hmalakna hrang hrangte chu khaikhawma hlâwk leh rah ṭha chhuah thei tur bera thlun zawm zel tum a nih thu a sawi.

Parliamentary secretary (RD) Lt. Col. ZS Zuala chuan, MGNREGA siam a nih chhan
ṭobul hriat a pawimawh tih sawiin, "Mirethei tak tak hna thawh tur hre lo leh thawh tur nei lote puihna atan inhlawhfakna ṭha siamsak tumna a ni. Village Employment Council (VEC)-te pawhin chu chu hre rengin, hna kalpui kawngah fimkhur se ka duh," a ti.

MzSRLM state mission director K Lalrinzuali chuan, MzSRLM hnuaia hriat tur pawimawh hrang hrang a sawi a, "Self help group din tawh ṭhin ni mah se, training mumal dawn loh vang leh chhan dang hrang hrang vangin hlawhtling an tam tawk lo," a ti.

MzSRLM hnuaiah hian khaw-tlangin puih tlaka ngaih leh an thlan aṭangin chhungkaw tina hmeichhia/nu pakhat zel SHG-ah hian an tel thei. Felfai taka an indin hnuah revolving fund-te siamsak niin training pek an ni ang a, sum pûka rulh leh tihpun an thiam hnuah bank loan hmu turin department-in a buaipui dawn a ni.

Inkhawm hi DRDA pro-ject director CC Lalchhuang-kima'n a kaihruai a, Champhai leh Khawbung RD block-a VC leh VEC-te an tel.