Assembly session ṭan a ni Member-te'n mi paruk an sún

2nd September, 2020

Nimin khan Mizoram Legislative Assembly session ṭan a ni a, President hlui Pranab Mukherjee leh House-a member lo ni tawh mi pangate sûn an ni. Session hi vawiin leh naktukah chhunzawm a ni dawn a, naktukah zawh nghal a ni ang.

Session ṭan hma hian MLA-te chuan Assembly conference hall-ah Pathian hnena inhlanna hun hmangin, an ṭawngṭai rual. Ṭawngṭai rual kaihruaitu Mizoram UPC general superintendet Rev. C Lalremsanga chuan, roreltu chu Pathian ruat an nih thu sawiin, "Rorelna thlei bik an neih a thiang lo. Rorelna chu Pathian ta a ni," a ti.

Session ṭan a nih hnuah chief minister Zoramthanga chuan, session hnuhnung ber leh tun ṭum session inkara thi President hlui Pranab Mukherjee leh MLA hlui pangate chanchin leh uina thu a sawi.

Uina thu hi ZPM Legislature Party leader Lalduhoma, Congress Legislature Party leader Zodintluanga, BJP member Dr BD Chakma, MNF member R Lalzirliana, INC member KT Rokhaw, MNF member Lawmawma Tochhawng leh ZPM member Vanlalhlana te pawhin an sawi bawk. Chumi hnuah Speaker kaihhruainain sûnna hun hman a ni.

Nimina session-ah hian deputy chief minister Tawnluia chuan, 'Twenty Eight Annual Report 2018-19 of the Mizoram Public Service Commission' a pharh a; Health minister Dr R Lalthangliana'n Covid-19 kaihhnawihah paper chi hrang hrang a pharh bawk.

Health Minister bill put luh, 'The Mizoram (Containment and Prevention of the Spread of Covid-19) Bill, 2020 chu sawiho a nih hnuah pawm a ni. He bill hi Cabinet pawm angin dan (ordinance) anga hman mek a ni tawh a, Governor pawmpuinain May 3, 2020 aṭang khan hman a ni.

President hlui baka House-a sûnte

• F Sapa (1937-2020): Kum 1989-ah Congress ticket-in Lunglei South aṭangin MLA atan thlan a ni a, deputy government chief whip leh Lunglei District HPC vice chairman a ni tawh.

• J Lawmzuala (1944-2020): Kum 1998 khan MPC ticket-in Lunglei South aṭangin MLA atan thlan a ni a, KVI Board chairman a ni.

• Hiphei (1937-2020): Mizoram union territory a nih lai, kum 1972 (independent), 1978 (independent), 1979 (Janata Party) leh 1984 (Congress party)-te khan Tuipáng bial aṭangin MLA atan thlan a ni. Mizoram state-a hlànkai a nih hnuah Congress ticket vêkin 1987, 1989, 2013-ahte Tuipang bial aṭang thoin MLA atan thlan leh a ni bawk. MLA a nih chhungin speaker

ṭum hnih, minister of state leh deputy speaker-te a ni hman a; ṭerm hnih chhung Rajya Sabha MP a ni tawh bawk.

• Rokamlova (1941-2020): Congress party ticket-in kum 1984, 1987 leh 1989-ah Aizawl East-II bial aṭangin MLA atan thlan a ni a, MLA a nih chhungin cabinet minister leh speaker hnate a chelh.

• F Lawmkima (1941-2020: Kum 1993 khan independent-in Suangpuilawn bial aṭangin MLA atana thlan a ni a, Congress nena thawkhoin minister of state a ni.