Truck chesualah mi 2 thi

Nimin tlai dar 3:30 vel khan LPK truck MZ-01 D7507 chu Serchhip leh Keiṭum inkar, Serchhip aṭanga km 7 vela hlaah chesualin, kawng thlangah metre 300 vel a lum a, he thu ziah lai thleng hian mi pahnih an thi tawh.

Serchhipa journalist Zonuna Kawlni hnen aṭanga thu dawn danin, truck-ah hian mi pakua chuangin, chhungkhat hnai vek an ni a, Biate-a chhungte tlawh tura kal an ni. Chetsualna hmunah hian Lalhriatpuia (28) s/o Lianhnuna, Serchhip Zion Venga leh Zawl-chhingi (56), Salem Veng, Aizawlte an thi.

Mi dang pasarih an hliam a, Serchhip damdawi-inah lak niin, an zinga pathum chu an na zual deuh nia thu dawn a ni. Truck hi Lal-rinchhunga, Serchhip Hmar Veng ta a ni a, amah hi hliam na zual zingah a tel. Motor hi Lalrinchhunga fapa, Lianzuala khalh a ni. Hliam zingah hian naupang pahnih an tel.