AMC-in enfiah phawt dawn

Aizawl Municipal Council (AMC) chuan, Chanmari-Chaltlang inkar leh Bawngkawn-Durtlang Leitan inkar kawngpui sîra in sak mekte chu enfiah hmasaka hmalak a nih tur thu an sawi a; Durtlang chhoah chuan kawng sîr chhak leh thlang ft. 50 ve ve huam chinah in sak phal loh a nih thu an sawi.

Vanglaini thudawn danin, AMC commissioner Dr H Lalthlangliana'n press mite a lo hrilh tawh angin, AMC hian Chanmari-Chaltlang leh Bawngkawn-Leitan kawng chhoa in sak chu Aizawl Master Plan, August 2013-a hman ṭan hmaa dan anga sakte tih loh, chumi hnua phalna nei loa sakte chu enfiah phawt an tum a; sak mek pawh chhunzawm lo a, an bungrua pawh kawngpui tichêp zawnga dah lo turin an hriattir a ni.

Khapna bika in sa mek leh sak tumte chuan AMC-ah compensation an dil a, mahse, AMC lam chuan dan anga sak leh Aizawl Master Plan hman hnua sak chu uluk takin an enfiah hmasak tur thu an sawi.