NERLP kalphung leh hnathawh sawifiah

Aizawl district-a North East Rural Livelihood Project (NERLP) hotute chuan nimin khan Aizawl Press Club-ah thuthar thehdarhtute kâwmin, an kalphung leh hnathawh dante an sawifiah. NERLP hi Mizorama RD block pangaa khaw 88-ah kalpui mek a ni a, self help group-te ṭanpui nan cheng vbc. 20.29 an sem tawh.

NERLP district project manager (DPR) Reuben Ranglong chuan, NERLP chu kum 2012-ah Ministry of DoNER-in an din a ni tih a sawi a, "NERLP hnathawhna atan hian DoNER hian World Bank aṭangin sum a pûk a, tunah hian hmarchhak state pali - Mizoram, Tripura, Nagaland leh Sikkim-ahte district pahnih ṭheuh thlang chhuakin hna thawh mek a ni. Mizoram bikah chuan Aizawl leh Lunglei district-ah hna thawh a ni," a ti.

Reuben Ranglong tarlan danin, district tina thawkte khaikhawm turin Regional Project Management Unit (RPMU) Guwahati-ah an awm a, anni hian district tinte hnathawh an vil ṭhin. Aizawl district bikah chuan NERLP chu kum 2013-ah Mizoram sorkarin a hawng a, block pangaa khaw 88-ah kalpui mek a ni. Nodal secretary atan Mizoram sorkara Rural Development secretary ruat a ni.

Field level-a hna thawk tur leh block office vawng turin project facilitation team (PFT) hnuaiah dah vek a ni. PFT-te chu block project coordinator (BPC) kaihhruaina hnuaiah hna an thawk a, BPC hnuaiah area coordinator awmin, pakhatin khaw panga zel enkawl ang an ni. Anni bakah hian accountant leh MIS cum office attendant-te'n an ṭawiawm.

Hna thawktu self help group (SHG) facilator, bank facilator leh para professional an awm a; anni hi mipuiin an thlan chhuahte an ni. SHG facilator hi khaw tinah awmin, SHG tamna deuhah chuan pahnihte an awm.

Reuben Ranglong chuan, SHG-te ṭanpuina atan cheng vbc. 20.29 an sem tawh tih sawiin, "SHG member-te'n an thil dehchhuah awlsam leh man man zawka an hralh chhuahna dap chhuahpui turin producers organisation (PO) pasarih din a ni tawh a, PO pakhat zel dinna atan cheng nuai 3 sanction tura ruahmanna siam a ni," a ti.

Zawhna chhangin NERLM hotute chuan, SHG din turin hmeichhe hlang an nih a ngai tih a sawi a, "Kum 18-35 inkar an ni tur a ni a, zirlai an tel thiang lo," a ti a; trade thlan bik awm loin, group-te'n an duh ang ang eizawnna tur atan an thlan ṭhin thu an sawi.

SHG-te hi a vawi khatna atan seed fund Rs. 20,000 pek ṭhin an ni a, chu chu member-te'n an mamawhna engah pawh an awmna group aṭangin an pûk ṭhin. Chumi hnuah livelihood tranche-I Rs. 40,000 pek leh an ni a, chu chu member zingah first priority panga inthlang chhuakin, an eizawnna atan ruahmanna siampui ṭhin. Livelihood tranche-I zawh hnuah tranche-II ah Rs. 40,000 pek leh a ni a, pawisa la pûk ve lote ruahmanna siampui leh ṭhin an ni.