Pawl 1-8 zirlaibu a thlawnin sem ṭan

Mizoram SSA chuan, kum 2016-17 academic session atan sorkar sikul leh sorkar ṭanpuina dawng sikula pawl 1-8 zirlaite hnenah nimin khan zirlaibu a thlawnin a sem ṭan.

Thu dawn danin, zirlaibu hi nimin khan Serchhip district-ah sem ṭan a ni a, district dangah pawh sem zel a ni ang.

SSA hnuaia zirlaibu sem mekah hian, pawl 1-5 zirlaibu chu a kimin an sem thei dawn a; pawl 6-8 erawh chu a bu kimin an sem thei dawn lo a, an sem loh zawng chu zirlaite'n an lei a ngai dawn a ni.

SSA chuan a hma lama thuchhuah an lo siam tawhah, zirlaibu a thlâwna sem kim theih loh tur zingah Class III, IV leh V zirlaibu a kima an sem theih loh tur thu an lo tarlang tawh a; mahse, hengte hi a kimin an pe leh thei dawn a ni.

SSA thuchhuak chuan, "Central sorkarin zirlaibu leina atana sum a rawn pek bakah, state sorkarin state budget aṭangin lei belhna tur sum mamawh cheng nuai 24 a pek dawn vangin zirlaibu sem theih a pung ta a ni," a ti.

SSA hnuaia zirlaibu semte hi Ministry of Human Resource Development-in India ram puma naupang pakhat zel tana a phalsak aṭanga chhût a ni a; Pawl 1-5 tan zirlai pakhat zelah Rs. 150, pawl 6-8 tan zirlai pakhatah Rs. 250 zel phalsak a ni.