KHAWTHLIR

Assembly session

Governor Lt. Gen. Nirbhay Sharma chuan, April 21 hian Assembly session a ko. Thu dawn danin, session-ah hian The Mizoram (Land Acquisition, Rehabilitation and Resttlement) Bill, 2015 sawihoa pass tum a ni ang. Bill hi Assembly session hnuhnung berah khan put luh a ni a, siam-
ṭhat ngai laite siamṭha turin Select Committee hnenah hlan a ni.

Painting exhibition

HK Jerry Ramliana buatsaih 4th Solo Exhibition of Paintings chu nimin khan Vanglaini editor K Sapdanga'n Art & Culture Achive Hall, Babutlangah a hawng. Exhibition hi I&PR dept. leh Mizoram Arts Development Society sponsored a ni a, April 16 thleng zing dar 10
aṭanga tlai dar 5 thleng hawn a ni ang.

Tanpui nan hlan

Vanglaini picture of the month lawmman dawngtu Alfred Vanchhawng chuan a lawmman dawn Rs. 1,000 chu Mamita pâ ei vanga mi pali an thihnaa chhiatna tâwk chhungkuate ṭanpui nan a hlân. Vanglaini chuan Facebook-ah Vanglaini Thlalak group a siam a, chuta miin thlalak an thawh, Vanglaini chanchinbua tihchhuahte aṭangin picture of the month hi thlan ṭhin a ni.

Dr C Silvera rál

Governor Lt.Gen. Nirbhay Sharma chuan, nimin khan April 9-a thi Union minister of state hlui Dr C Silvera chhungte chu an chenna inah a tlawh a, ràlna a hlân. Larsap chuan, Dr C Silvera chu mi bik, chhungkaw pa nih tling leh entawntlak nia a lo hriat tawh ṭhin thu a sawi.

Kal phal lo

Traffic SP chuan thu-chhuah siamin, vawiin aṭangin SIPMIU hnuaiah Durtlang leh Selesih inkara feeder main pipe line siam a nih dawn avangin Selesih leh Zuangtui inkar
inkalpawhna World Bank road-ah hna thawh hun chhungin lirthei kal phal a ni dawn lo tih a puang.

MHIP jubilee

Lunglei Bazar Veng MHIP chuan, nimin khan an veng YMA Hall-ah an kum 40 tlin an lawm a, bialtu MLA Chalrosanga Ralte-in a hmanpui. Chalrosanga chuan, MHIP member-te chu chhungkua leh khawtlang inrêlbâwlnaah an pawimawhna hre thar turin a chah a, "Mizo hmeichhiate hi sorkar hna, sumdawnna kawngah leh politics lamah an duai lo tawh hle a ni," a ti.

Sikserh do thla

Nimin khan Saihaa IPR conference hall-ah 'Anti Malaria Month' hawn a ni. Hawnna inkhawmah hian Saihaa medical officer Dr Lalnunziri'n 'Symptoms, diagnosis and treatment of malaria' tih thupui a sawi.