Larsap leh NSDC member an inkâwm

National Skill Development Corporation (NSDC) executive member, Dr Sapna Poti chuan nimin khan Raj Bhavan-ah Governor Lt.Gen. Nirbhay Sharma a kâwm a, Mizo ṭha-laite tana thiam thil zirtirna tura thil ṭangkaite a sawipui.

Governor chuan, Ministry of Skill Development and Entrepreneurship hnuaia hmalakna hrang hrangte chu tuna Mizoramin hun a tawng mekah Mizo ṭhalaite tan a pawimawh tak zet tih a sawi a, "Mizo ṭhalaite'n NSDC puihna an mamawh. Rel kawng rawn lut tur te, international border trade phuisui chho mek zel vangte leh KMMTTP puitlin tur vangtein Mizoramah sumdawnna nasa takin a pung thut dawn. He thil inthlak danglam thut tur atan hian tun dinhmunah Mizo ṭhalaite an la inpuahchah tawk lo hle a ni," a ti.

Larsap chuan, Mizo ṭha-laite'n hna chi hrang hrang an thawh thiam theihna atan skill training ṭha zawk hmanhmawh taka neih a ngai tih sawiin, "Mizoram hian Ministry of Skill Development and Entrepreneurship hnuaia hmalakna hrang hrangte state dang aiin a mamawh zawk a ni," a ti a; hmarchhak state zawng zawng bialtu a nih anga hma lakpui turin Dr Sapna Poti a sáwm.

Dr Sapna Poti chuan, Ministry of Skill Development and Entrepreneurship-in hmar-chhak bial a duhsak thu tarlangin, an hmalakna hrang hrangte Governor a hrilh.

NSDC Member chuan, Mizoram chhunga industrial training centre ṭhenkhatah NDSC-in contemporary skill training-na hmun siam a tum tih sawiin, "Tualchhunga mi kan thawhpui, ṭhalaite thiamthil zirtirtu (local training partner)-te tah hriam zel tum a ni. Ṭhalaite'n website-ah Pradhan Mantra Kaushal Vikas Yojana (PMKVY) scheme lo zir chiang se a ṭangkai hle ang," a ti a; local training partner-te'n tualchhung mite mamawh thiam-na zirtir dante an ngaihtuah tel a pawimawh thu a sawi bawk.