Zofate engtik hunah emaw rorelna pakhat hnuaiah kan la awm ka ring: Zodintluanga

Zo Re-Unification Or-ganisation (ZoRO) ṭhalaite chuan, nimin khan Vanapa Hall-ah ZoRO Ṭhalai Kût an hmang a; Sports & Youth Services minister Zodintluanga'n hmanpuiin, "Zofate hi engtik hunah emaw chuan rorelna pakhat hnuaiah kan la awm ka ring tlat a ni," a ti.

Zodintluanga chuan, Zofate'n zalenna an la nei ngei tura a ngaih thu sawiin, "Zofate hi India, Bangladesh leh Myanmar-ahte tunah awm hrang mah ila, engtikah emaw chuan ram bung khatah hrui khat vuanin rorelna pakhat hnuaiah kan la awm hun tur a la thleng ngei ang tih ka ring tlat a ni," a ti a; ZoRO president ṭhin R Thangmawia leh Capt. LZ Sailo te awm tawh lo mah se, 'Insuihkhawm leh zai i rel ang u' tih hla chu Zofate thinlungah ri nawn fo se a duh thu leh insuihkhawmna meichher chu ṭhalaite kuta a innghah thu a sawi.

Insuihkhawm lehna chu political party hamṭhatna leh hlâwkna atan kawih her chi a ni lo tih sawiin, Zodintluanga chuan, "Mizo chu nang leh kei kan ni. A din chhuahna tur pawh nang leh keia kutah a awm," a ti a; Zofate Jerusalem - Aizawl khawpuia chengte'n inpui nih an thiam a ṭul thu sawiin, "Kan men kan tihzau a, inremna leh insuihkhawmna kawngah theihtawp kan chhuah
ṭheuh a ṭul," a ti.

Mizote inpumkhat lehna kawngah hmasawnna nasa tak a awm tih sawiin, Minister chuan, "Engtik lai emaw
aṭang khan rimawi leh rawngbawlna hmangtein kan inpalai tawn zak zak a, a lawmawm hle, a ti a; a ṭhen an chhuk a, a ṭhen an chho chu hmasawnna rahbi pawimawh tak a ni tih a sawi.

Zodintluanga chuan, Mizo ram leh hnamin hma a sawn dawn chuan puitlin a ngaih thu sawiin, "Mizote kan naupang rei lutuk a, college kan zawh thlengin nu leh pa kan ring nasa lutuk. Kum 50 dawn thlengin ṭhalai hruaitute kan ni a, MUP member kan hnaih hman hle
ṭhin. Kan khawtlang inkaihhruainaah fel lo lai a awm tih a chiang a, hna thawk tur chuan naupang leh ṭhalai ni rei em em, naupang chhe enkawla enkawl duh si lo hi kan kat nawk mai. Hnamin hma a sawn dawn chuan puitlin lam kan pan a ngai," a ti.

Zo tih thumal chu mawi leh duhawm tak a nih laia thil chhe lam sawi nana mi ṭhenkhatin an hmang ṭhin chu pawi a tih thu sawiin Minister chuan, "Zo tih thumal mawi tak hi thil duhawm, ṭha leh mawi sawina a nihzia i lantir zawng ang u," tiin ṭhalaite a sáwm.

ZoRO Ṭhalai Kût vawi khatnaah hian thupui chu 'Inpumkhatna' tih a ni a; ZoRO hruaitute bakah, MZP, MSU, Aizawl City College Joint SU hruaitute'n thu an sawi a ni.