Kolasib leh East Lungdarah RTI Act zirho

Nimin khan Kolasib-a SIRD conference hall-ah leh, East Lungdara Thangburha Hall-ah Right to Information (RTI) Act zirhona buatsaih a ni.

East Lungdar-ah chuan training hi Mizoram Information Commission leh Tuichangral Zirlai Pawl (TCZP) ṭangkawp buatsaih niin, chief information commissioner (CIC) Lal Dingliana'n a hmanpui a; East Lungdara zirlaite leh zirtirtute bakah, tlawmngai pawl hrang hrang aiawhte an tel.

CIC chuan, RTI Act chu langtlang sorkar siamtu leh hmasawnna thlentu a nih theih bakah, corruption venna hmanraw ṭha tak a ni tih a sawi a, "Rinawmna leh huaisenna min petu, dikna ṭantu a nih vang-in mipuite pawhin kan ngaihvena kan hman
ṭangkai hi tihmâkmawh a ni. RTI Act hi hlauh tur a ni lo a, mi dang hêkna a nih loh bakah, thil dik lo hâi chhuahna hmanrua a ni," a ti.

Kolasib-ah chuan training hi district chhung-a SPIO leh SAPIO-te tan buatsaih a ni a, DC H Lalengmawia'n a hmanpui. H Lalengmawia chuan, ram changkanna chu economy-a san ringawt a ni lo tih sawiin, "Mihringte tihhmasawn a nih loh chuan ram a
ṭhang thei lo. RTI Act hi kan hman theih nghal ram chak, hmasawn, hrisel leh thianghlim neih theihna tura lungphûm a ni a. Dan kan hriat hi khua leh tuite'n a bata kan bat a ni," a ti.

Training-ah hian RTI Act hman dan te, RTI Act-in a huam chin te, thubuai remnate leh SPIO leh SAPIO-te mawhphurhnate zirho a ni.