MZU UG final exam ṭan a ni
Mizoram University (MZU) chuan nimin khan under graduate final semester/year zirlaite tan exam an buatsaih ṭan a, zirlai ṭhahnem takin exam hi an hmachhawn.
Under graduate final exam hi MZU hian buatsaih a lo tum tawh ṭhin a, mahse, Covid-19 hripui léng vangin kalpui theih a ni lo ṭhin. Nimina exam ṭan hi Mizorama college hrang hrangah buatsaih a ni a, class room-a exam mi ṭhahnem tak an awm laiin, online hmanga exam eng emaw zat an awm bawk. Ruahman dan chuan, exam hi September 21, 2020-ah zawh a ni ang.
MZU hian post graduate leh professional course hrang hrangte exam an kalpui mek bawk a, PG-a department tam zawk chuan exam an zo tawh. MZU controller of examinations Prof. Lalnuntluanga chuan, exam hmachhawntu hi UG-ah zirlai 5,000 vel leh PG-ah zirlai 2,000 vel an nih thu a sawi.