Sumdawng tan 'dan sakei' - MBCC

Sumdawng pawl 47 telna Mizoram Business Coordination Committee (MBCC) chuan nimin khan thuchhuah siamin, The Mizoram Shops and Establishment Acts, 2010 leh Amendment Bill 2020 chu sumdawngte tan 'dan sakei' nia an ngaih thu an tarlang.

MBCC hruaitute chuan nimin khan an convener F Rodingliana kaihhruaiin The Mizoram Shops and Establishment Acts 2010 leh The Mizoram Shops and Establishment (Amendment) Bill 2020 chungchang leh Study Group-in an zir chianna report-te an sawiho a ni. Thuchhuah siam nghalin, "MIMA-in dan sakei tia an lo sawi tawh MNF sorkarin a rawn tuaihnúma hman theih tura a chhawp chhuak thar leh hi a hma dan ai khan a hlauhawm zawkah kan ngai," an ti. 

MBCC tarlan danin, The Mizoram Shops and Establishment Acts hi hman a nih lohna turin Congress sorkar laia Labour Minister hnenah an lo ngen tawh a, an ngenna chu sorkarin ngai pawimawhin, tun thlengin hman a la ni ta lo. State dangah pawh proprietorship angah chuan an hmang lo a ni.

He dan hi sorkarin sumdawngtute a hmantir dawn a nih chuan, sumdawngte bakah mipuiin an tuar dawn tih sawiin MBCC chuan, Mizoramah chuan la hman rih loh ṭha an tih thu an sawi a, "Kan dinhmun enin kan la zo loah kan ngai. Sorkar hmasain kum 10 lai sumdawngte ngenna vanga a lo dahṭhat tawh tun sorkarin hman tura a tharthawh hi hriatthiam har kan ti hle a ni," an ti.

MBCC chuan, The Mizoram Shops and Establishment Acts chu Mizoram mipui hmakhaw ngaih vanga hmang lo turin sorkar an ngen tih an sawi a, "He dan hi hman a nih lohna turin theih tâwkin hma kan la dawn a ni," an ti a; an hmalakna ṭawiawma telpui turin sumdawnna kalpuitu mimal leh pawlte an sáwm a ni.