BPL Baseline Survey-ah YMA-in tel a tum lo

YMA Central Coordination Committee (CCC) nimina Central YMA Hall-a ṭhukhawm chuan, Mizoram sorkarin BPL Baseline Survey nei tura a ngenna chu an hnâwl a, inrawlh loh an rel.

YMA CCC meeting hi president Lalbiakzuala'n a kaihruai a; Mizoram sorkara Planning & Programme Implementation department-in BPL Baseline Survey neihnaa YMA thawhpuia an sawmna chu ngaihtuahin, "Ngun taka ngaihtuah a nih hnuin tel ve rih loh ni se," an ti.

Swachh Bharat Mission (Urban) hnuaia Mizorama khawpui 23 (notified town)-a YMA branch dinnaah chhungkua êk-in nei lote saksak an nih theih nan UDPA department leh CYMA-in thawhhona thuthlung (MoU) an ziak a, ek-in pakhat sakna atan chhungkaw pakhatah Rs. 6,000 zel ruahman a ni.

Hemi chungchangah hian YMA CCC chuan, member-te hriattir a, a ṭul anga YMA sub-headquarters, group leh branch-ah hmalak zel ni se, tiin an rel.

YMA CC chuan, General Conference neih loh kuma rorel inkhawm neih ṭhin turah, rorel palai turte chu YMA Dan Bua awm angin, General Conference palai anga kal ni se tiin a rel bawk.

Rorel inkhawm palai turte chu - CYMA OB leh CEC member, CYMA OB lo ni tawh te, sub-headquarters OB-te leh executive member 10
ṭheuh, group aiawh paruk leh branch aiawh paruk an ni ang.