Khawlailungin Kurtai Kût an hmang

Khawlailung Sugarcane Growers’ Association (KSGA) chuan nimin khan an khaw bazar kâwnah Kurtai Kût an hmang a, minister C Ngun-lianchunga'n a hmanpui.

Kût pa C Ngunlianchunga chuan, Khawlailunga chhungkua 80% vel kut hnathawktu an ni chu ropui a tih thu sawiin, "Mizoram khua zawng zawngah Khawlailung aia kut hnathawh uar khua an tam bik lo. In 500 chuang zinga in 130 chauhin fu an chíng chung pawha hetiang dinhmun an thleng thei a nih chuan, in 300 talin chíng turin ṭan la se, hei ai hian an hlawhtling lehzual ang," a ti.

Fu thar a tam lehzual chuan sorkar bakah ram páwna company liante tan nasa lehzuala ṭanpuina leh hmalakpuina kawng a inhawn dawn thu sawiin Minister chuan, "Kut hnathawktute'n theihtawp an chhuah phawt chuan sorkarin a thlahthlam dawn lo," a ti a; RKVY hnuaiah Khawlailung aṭangin chhungkaw paruk thlang chhuakin, Rs. 2,50,000 an dawn tur thu a puang.

C Ngunlianchunga chuan, Khawlailung chu khaw vannei tak an ni tih sawiin, "Lok Sabha MP kan neih chhunin Mizoram chhunga khaw za tam zingah model village atan a thlan hmasak ber leh awmchhun in ni. RKVY aṭanga sum hmuh zinga 15% zel Khawlailung tan hman tura ruahman a a ni," a ti.

Kurtai Kût hi Serchhip DC Dr Lalrozama, additional PCCF Rosiama Vanchhawng, DRDA project director Teresy Vanlalhruaii leh MRB New Sechhip manager C Vanlalthlana te pawhin an hmanpui.

Khawlailung hi in 515 khua an ni a, kut hnathawk chhungkua 400 awmin, an zinga 130 chuangin fu an chîng. Kum 2015 khan kurtai quintal 2,500 vel tharin, Rs. 1,25,00,000 hû vel an hralh a, kuminah tam zawk thar an inbeisei. Kum 1938 vel aṭang khan Khawlailungah fu an lo chîng ṭan tawh a, kum 2007-ah Sugarcane Growers’ Association din a ni.