Kum khata ramngaw aṭanga thil hlutna Hmuh chhuah zat vbc. 515.35-ah ngai
Mizoram sorkar chuan thu-chhuah siamin, kum khat chhunga Mizorama ramngaw aṭanga thil hlutna hmuh chhuah zat chu cheng vbc. 515.35 nia chhût chhuah a nih thu a tarlang.
Sorkar thuchhuah chuan, Mizoram chu India ram state zinga ramngaw nei ṭha ber leh ramngawin a khuh ṭhat berna ram ni a hriat lâr mek a nih thu a tarlang a, "Ramngawte hi mipuite tan an ṭangkai em em a, a bik takin thingtlang mipui, heng ramngaw aṭanga an mamawh chi hrang hrang la ṭhinte tan a hlu lehzual bik hle," a ti.
Mizoram CCF Planning and Chief Wildlife Warden ṭhin, Dr NS Bisht chhût chhuah danin, Mizoram ramngaw aṭanga thil hlutna hmuh chhuah zah chu kum khatah cheng vbc. 515.35 hû a ni a; hlutna tam ber chu thing tuah tur lakkhawm niin, cheng vbc. 112.46 hû a ni. Thingkung, thing ngul leh ban atana lak khawm chu cheng vbc 82.14 hûa chhût a ni.
Tuna ramngaw hlutnate chu state economy atan chhiar tel ve a la ni lo tih tarlangin sorkar thuchhuah chuan, "A chhan chu hengte hi 'leilung thil thlawn pek' liau liaua ngaih vang a ni. Khawtlang mipuite ramngaw humhalh tura zirtir hi a pawimawh em em a, heng bakah hian kan open forest neihte pawh hi hmasawn zawk tura hman thiam a pawimawh hle," a ti.
Sorkar thuchhuah chuan, Mizoram ramngaw zinga hmun thum a ṭhena hmun hnih chu open forest hnuaia awm a nih thu tarlangin, "Heng ramngaw aṭangte hian thil hlu lak chhuah a tam lem lo," a ti a; hei vang hian kan dense forest (ramngaw chhah tha) neih hote'n nasa takin an tuar a, an hlutna pawh nasa takin a tlakhniam phah tawh thu a tarlang.
Kum khata ramngaw aṬanga Thil lak chhuah hlutna
θ Thing tuah atana ramngaw aṭanga lak cheng vbc. 112.46 hû lak a ni.
θ Cheng vbc. 82.14 hû chu thingkung, thing ngul leh ban atana lak a ni.
θ Khuai, sava leh phengphehlep ten thlai chi inthlah an puihna chu vbc. 72.53 hû a ni.
θ Ramngaw aṭanga chaw leh khawsakna atana lak chu cheng vbc. 59.01 hû a ni.
θ Leimin tur leh leilung a ven ṭhat hlutna chu cheng vbc. 52.7 hû a ni.
θ Sik leh sá inthlak danglam nasa lutuk tur lak a venna chu cheng vbc. 27.04 hû a ni.
θ Vawk chaw leh ran chaw atana hman ral hlutna chu cheng vbc. 25.93 hû a ni.
θ Ramhmul lak khawm aṭanga sum lut zat hlutna chu vbc. 25.14 a ni.
θ Boruak a siamṭhatna leh mihringte hriselna atana a hlutna cheng vbc. 16.95 a ni.
θ Rawtuai khawrhna aṭanga sum hmuh zat chu vbc.15.28 a ni.
θ Tui mamawh tur zat a chelhna leh a pek kual zat hlutna cheng vbc. 12.04 a ni.
θ Vbc. 8.40 hû mau lak ṭhin a ni.
θ Intihhlimna atana ramngaw hlutna chu cheng vbc. 2.31 a ni.
θ Natna hri ṭha lo laka mihring venhimna kawnga a hlutna cheng vbc. 0.57 a ni.