Larsapin SCERT leh Chhinlung Academy a tlawh

Governor Lt.Gen. Nirbhay Sharma chuan nimin khan State Council of Educational Research & Training (SCERT) leh Mizoram Shiksha Abhyan Mission (SSA) hnuaia model school zinga mi Chhinlung Academy, Vaivakawn a tlawh.

SCERT auditorium-a inkhawm buatsaihah Larsap chuan, "Mizoramin a neih sa remna leh muanna, boruak hrisel bakah, ram leilung hauhsaknate rem khawm a, hlawh-tlinna thawk chhuak turin mithiam an awm a ngai a, mithiam chher-chhuak turin zirna ṭha zawk a neih hmasak a ngai. Tunlai khawvelah ziak leh chhiar thiam an chhawr tlak tawh loh a, hna thawk atana chhawr tlak ni turin ziak leh chhiar thiam piah lamah IT thiam nih tel a ngai," a ti.

Governor chuan, nakin lawkah Mizoram chhungah hna tam tak thawh tur a awm tur thu sawiin, "Kan ṭhalaite'n hei chu ka thawk thiam lo tia lo chhángin, páwn lam mi an kian zel ang tih ka hlauthawng a ni,” a ti a; SCERT-a mithiamte chu zirlaibu siamtu an nih ang leh zirtirtute zirtirna pe leh chhawngtu an nih anga skill training bakah, vocational subject tihmasawn turin a chah.

India mite'n Sap ṭawng an hman nachhan chu khawvel ram tam zawka mi tam zawk ṭawng tuallêng a nih vang a ni tih sawiin, Larsap chuan, "Mi dangte ruala ke pên ve a, hmasawn kan duh ve chuan thiam a ṭul. Mizote pawhin India state dangte leh khawvel ramchang kang zawkte ruala hmasawn kan tum a nih chuan tun aia nasa zawka English leh Hindi kan thiam a ngai. Mizo hnam zia leh hnam rohlute hluihlâwn mai loin, rilru fím tak pu chunga khawhawi zauh a ṭul," a ti.

Chhinlung Academy a tlawhnaah Governor chuan sikul building leh sikul naupangte a en a, chumi zawhah zirtirtute a kâwm a ni.

Lt.Gen. Nirbhay Sharma chuan, zirtirtute tan sikul naupangte mi pui-tlinga chher chhuah chu hna awlsam a nih loh thu a sawi a, "Sikul naupang zawng zawngte'n talent an neih a inang vek lo a, an thiam theih zawng hriatsak leh chumi hmanga kaihhruai chu zirtirtute mawhphurhna a ni," a ti.