Kolasib DC leh Kolasib district MJA-te'n Tlawng lei leh Meidum kawng enfiah

Kolasib district MJA-te chuan nimin khan bawrhsap H Lalengmawia hoin Bairabi-a Tlawng lei (RCC bridge) dawh hna, ABCI-in an thawh mek leh Bairabi aṭanga Meidum panna kawng, NH-154 km. 89-99, Sunshine Oversease-in an siam mek a hmunah an en.

Bairabi Tlawng lei dawh mek an ennaah hna viltu, Kawrthah PWD SDO Lalduhzuala chuan, hnathawh dan kalhmang a lo hrilhfiah a; tunah hian ABCI-in labour 40 an dah thu leh May 2016 chhungin hna lian zual an thawh zawh hman an inbeisei thu a sawi.

Bairabi Tlawng lei hi metre 160-a thui, metre 7.5-a zau tur a ni a, kum 2007-ah hna thawh ṭan ni tawh mah se, chhuanlam hrang hrang siamin ABCI-te'n hna an chhunzawm lawk lo a ni.

PWD aiawhte chuan, tunah hian sorkarin an thawh chin ang zelah leibâ awm loin sum a pe vek tawh a, hna thawh zawh rualin contractor-te'n pawisa an lak theih turin sum pawh dah vek a nih tawh tih media-te an hrilh.

Chanchinbu mite pawhin lei dawh mek chu ṭum eng emaw zat an lo tlawh tawh thu sawiin, zawh hun tura an insawi hunah chhuanlam an siam ziah thu an sawi a; tuna zawh hun an sawia an intiam anga an awm lo a nih chuan legal notice pek mai an rilrûk thu an hrilh.

Bairabi ramri aṭanga khaw chhung tan tlanga Meidum thleng kawngpui siam mek an enfiahnaah Bairabia PWD SDO Lal-rin-awma Hrahsel leh a thawhpuite'n an lo dawngsawng a; hna thawktu Sunsine Over-seas aiawhte chuan, hna thawh zawh hun tura an tih, June 30, 2016-ah chuan peih hman an inbeisei thu an lo hrilh.

Chanchinbu mite'n an tlawh lai hian company lamin tender an chhannaah, kawng siam viltu tura engineer panga hming an tarlante hmuh tur an awm lo. Zawhna chhangin Sunshine Overseas supervisor chuan, an engineer pakhat chu Champhai aṭanga
chhuk tur a nih thu a sawi a, engineer dangte chanchin erawh a sawi thei lo thung.

Kolasib DC hoa an tlawh lai hian bungrua hmuh tur a awm mumal lo a, GSB metric ton 2,475 an mamawhah metric ton 1,500 chauh an nei rih a ni.

Kawngpui siam tur hi Railways lamin Prime Minister hnena an ngen angin, PM package aṭanga sum dawn a ni a, an hnathawh danah kumin June 30-ah an zo thei dawn loin an hria a; chu vang chuan an hnathawh dana lungawi loh thu sorkar laipuia an thlen tur thu media-te chuan an hrilh.

Sunsine Overseas aiawh chuan, darkar 24 chhung châwl loa hna an thawh tur thu a sawi a; tun dinhmunah labour 20-in hna an thawh mek thu leh chak zawka hna thawk turin sorkar nen agreement an la siam loh thu an sawi bawk.

Kawngpui siam nan hian cheng vbc. 24.1 ruahman niin, km. 10.5-a thui siam tur a ni a; March 15, 2016-ah hna an thawk ṭan a ni.