YLA-in general conference an hmang

Young Lai Association (YLA) chuan Thawhlehni zan aṭang khan Sangau-ah General Conference an hmang a, nimin khan parliamentary secretary H Zothangliana'n a hmanpui.

H Zothangliana chuan, Lai hnam chu hmanlai chuan hnam huaisen leh tlawmngai niin mite'n an sawi ṭhin tih sawiin, "Vawiinah hian keini an thlahte hian chutiang bawka chawimawi chu kan hlawh em tih kan inzawh a ṭul
hle. Ram leh hnam din chhuahna bul pawimawh tak mai chu mahni intodelhna a ni a, kan intodelh loa hna kan thawh nasat loh chuan kan ṭawng te, kan hnam ziate theihtawp chhuahin chawi lâr tum mah ila kan ti thei chuangin a rinawm loh," a ti.

Zirna ngaih pawimawh a ṭul tih sawiin H Zothangliana chuan, "Hriatna a tam poh leh chakna a pung ṭhin a, chu vang chuan kan ṭhalai rualte, tuna naupang duhawm tak tak zawng zawngte zirna lama ṭan laa theihtawp chhuah turin ka sâwm che u a ni," a ti a; zirlaite chu ruihhlo leh zûk leh hmuama sum leh pai luangral nasa lutuk te, taksain harsatna a tawh phah tamziate chhût fo turin a chah.

YMA General Conference hi zaninah a ṭiak dawn a, Central YMA leh Mara Thalai Pawl (MTP) aiawhte pawhin an hmanpui. Tun dinhmunah YLA-ah hian branch 105, group pariat leh sub-headquarters pali a awm a ni.