MPC leh PRISM party an inzawm Peoples Conference an din thar

Mizoram People Conference (MPC) party leh PRISM party-te chu nimin chhun dar 12 khan political party pakhatah an inchhùnfin a, hming dang - Peoples Conference party an invuah a, president chu Lalhmangaiha Sailo a ni.

MPC leh PRISM inchhùnfinna inkhawm hi nimin khan MPC party office, Treasury Square-ah neih a ni a, MPC-PRISM Joint Committee chairman R Zatawna'n a kaihruai. Lalrinzuala Chawngthu-in report a pek hnuah, Merger Agreement an ziak a, an president ve ve - Lalhmangaiha Sailo (MPC) leh Vanlalruata (PRISM)-te'n hming an ziak.

PC party-ah hian MPC president Lalhmangaiha Sailo chu president a ni zui dawn a, PRISM president Vanlalruata chu senior vice president a ni. MPC aṭangin V Lalṭhazuala leh PRISM aṭangin Lalrinzuala Chawngthu-te chu vice president an ni a, treasurer chu SL Ngursailova Sailo (PRISM) a ni.

PC president Lalhmangaiha Sailo chuan, MPC leh PRISM an inchhûnfin thei chu a lawm thu sawiin, "Ram hmangaih tak taktute'n kan ram an hruai hun a nghahhlelhawm a, tu candidate leh tu party policy-in nge ram hmasawnna min thlen thei ang tih ngun taka ngaihtuah chunga vote thlak a ṭul tawh takzet a ni," a ti.

PC President chuan, "Therhlo sem policy - MIP, NLUP, NEDP, SEDP leh a dang min tiam hmanga vote kan thlak hian ram siamṭhatna tur leh hmasawnna tur atan vote kan thlak em? Budget pawisa, development pawisa pawhpên hmang ral vetu ka ni em tih kan in ngaihtuah chian a ṭul tawh hle," a ti a; ram siamṭhat duhtu ram, hnam leh sakhua himna ngai pawimawhtu zawng zawng chu lungrual taka thawhpuiah a sáwm.

Vanlalruata pawhin thu sawiin, MPC nen an inzawm thei chu a lawm tak zet thu a sawi a, "NGO kan nih laia kan hmalakna tam takah Brig. T Sailo hun laia hmalakna chhunzawm a nih loh vanga hmasawnna awm lo kan hmu ṭeuh tawh. Kan sorkar hian sum leh pai enkawl kawngah hmalak a thiam lo a, Covid-19 vangin khawvel ram hrang hrang kan buai a, kan sorkar chuan ṭul miah loin sum tuakna atana hmangin mask vuah lo pawisa min chawitir a, mi ṭhahnemngaite sum thawh chu sawi loh, natna veite enkawlna pawh sum tam tak sên kan la ngai mek a ni," a ti.