Unlock 4.0 kaihhruaina tichhuak

State Disaster Manage­ment Authority hnuaia State Executive Committee chairman Lalnunmawia Chuaungo, chief secretary chuan September 2020 chhunga hman tur, Unlock 4.0 kaihhruaina chu August 31, Thawhṭanni zan khan a tichhuak a; Unlock 3.0 nen kalphung a inang tlangpui.

Biak-ina inkhawm phal a la ni lo a, zing ṭawngṭai inkhawm erawh mi 50 aia tam loin phal a ni. Hetih lai hian, sorkar laipui (MHA)-in Unlock 4.0 kaihhruaina a siamah chuan, containment zone páwn lamah chuan September 21, 2020 aṭangin sakhaw thilah mi 100 aia tam loa punkhawm/inkhawm a phal thung.

Unlock 4.0 kaihhruaina hi September 1-30, 2020 chhunga kal dan tur a ni a, a hmaa kaihhruaina siam tawhte chu a luahlân nghal a ni.

A.    RAMRI CHUNGCHANG

1.    Bairabi, Vairengte leh Kânhmun paltlang kawngpuite bungraw phur lirthei tan hawn a ni ang a, khualzin phur lirthei tan screening leh quarantine-te fel taka ruahman a nih theih nan Thawhṭanni, Ningani leh Inrinni apiangin zing dar 6 aṭanga chawhnu dar 2 chhung hawn ṭhin a ni ang.

2.    Lengpui Airport chu bungraw phur thlawhtheihna tan hawn a ni a, passenger flight tan hawn ni a hranpaa chhuah ṭhin a ni dawn.

B.    SCREENING & QUARANTINE

1.    Mizorama lut apiang entry point-ah enfiah (screen) zel tur a ni a, quarantine facility-ah khung hran tur a ni.

2.    Mizoram luh hmain mCOVID-19 mobile application mPASS-flight / mPASS-entry of persons hmangin an inhriattir lâwk tur.

3.    Quarantine facility-a awm/thlen man, ei leh in man leh swab test man pek dan tur chu DMR department-in July 20 leh July 24-a notification a lo chhuah tawh anga kalpui tur.

C.    OFFICE KAL DAN TUR

1.    Sorkar office leh office dangte inkaihhruaina zâwm chungin a pangngaiin an kal thei.

2.    Office dawr turte'n appointment lak hmasak tur.

3.    Dam lohna nei sa, hrisel lohna bik nei leh nau pâite chu chawlh (commuted leave) pek theih a ni.

4.    A theih chin chinah online-a office dawr leh bill pek a nih theih nan rua­hmanna siam tur.

5.    Minister-te public interview hun khâr rih a ni.

D.    MIPUI KHUAHKHIRHNA

1.    District khawpui tinah zan dar 8:30 leh zing dar 4:30 inkarah páwna chhuah khap a ni.

2.    District khawpuiah phalna nei loa vantlang hmuna mi panga aia tam awm khâwm phal a ni lo.

3.    Kum 65 chin chung lam te, taksaa harsatna nei te, nau pâite leh naupang kum 10 hnuai lamte chhuah loh hrâm tur.

4.    Mi dang nena awmhona leh vantlang hmunah hmai tuam ngei tur a ni.

5.    Mizoram páwn aṭanga lo lutte lo mikhual phal a ni lo.

E.    LIRTHEIA VEIVAH

1.    Mihring phur chi sum dawnna lirthei (commercial passenger vehicle)-te seat-a ṭhut thei zat (capacity) aia tam phur phal a ni lo.

2.    Lirthei khalhtute leh an mi phurhte'n hmai tuam vek tur.

3.    Driver-te'n passenger-te hman tur hand sanitiser an pâi reng tur a ni.

4.    A zing thei ang berin lirthei chhung leh vawnbánte tithianghlim ṭhin tur.

F.    ZIRNA-IN, BIAK-IN, etc.

1.    Zirna in zawng zawng khâr chhunzawm tur a ni a, online/distance learning kalpui theih a ni. September 21, 2020 hnu lama kal dan tur a hranpaa la siam leh a ni ang.

2.    Biak-ina inkhawm phal a la ni lo a, zing ṭawngṭai inkhawm erawh mi 50 aia tam loin phal a ni.

3.    Sport tournament buatsaih phal a ni lo. Mi 25 aia tam loin games & sports practice phal a ni.

4.    Cinema hall, auditorium, community hall, swimming pool leh intàwllènna hmunte khâr zel tur.

5.    Mitthi vuina, inneihna leh thil dang hrang hrangah mi 50 aia tam pun khawm phal a ni lo.

6.    Mitthi vuinaah pawl aiawh mi pahnih aia tam kal loh tur a ni.

7.    Hall remchangah mitthi vui tur a ni a, a telte hming, address leh phone number chhinchhiah tur.

8.    Mitthi/khawhar inah zai loh tur a ni a, thingpui sem loh tur a ni bawk.

G.    BUNGRAW CHAWK LUH: Kalphung hman mek anga kal zel tur a ni.

H.    DAWR LEH SUMDAWNNA

1    Bazar, dawr, petrol pump/filling station leh sumdawnna hmunah inkar hlata awm tur.

2.    Dawr neitute'n hand sanitiser chhawp ngei tur a ni.

3.    Dawrtute hming, address, phone number ṭha taka chhinchhiah tur.

4.    Loh theih loh thil a nih loh chuan dawr chhungah dawrtute luhtir loh ni se.

5.    Gym, beauty parlour, lu mehna, spa, etc. ah bungrua leh hmanruate tih­thianghlim reng tur a ni a, ṭum khatah mi 10 aia tam awm phal a ni lo.

6.    Dawr zawng zawng (damdawi dawr tiam loin) tlai dar 7 hmaa khàr vek tur.

7.    Inrinniah bazara mi an pun khawm tam lohna turin chawlhkar khatah ni thum tal thlai thar leh chawhmeh dang zawrhna hun ruahman ṭhin.

H.    AIZAWL BIKAH

1.    Lirthei intlàn chhâwk mek anga kalpui chhunzawm tur a ni. Intlân chhâwkin a huam lohte chu a hmaa mi ang a ni tlangpui.

2.    Pathianniah lirthei tlân chhuah phal a ni lo.

3.    Chhiattawh leh rikrum thilah chuan LTF-te'n lirthei tlân phalna an pe thei.

4.    Tul bik dangah leh Aizawl aṭanga chhuak leh lut tur tan Traffic SP-ah dil theih a ni.

I.    CONTAINMENT ZONE

1.    Chief Secretary leh DC-te'n containment zone leh lockdown an puang thei a, mi dangin puan phal a ni lo.

2.    Containment zone páwn lamah lockdown puan a ngaih chuan sorkar laipui ráwnin state sorkarin a puang ang.