MNF-in hri leng vangin inthlan ṭhulh

MNF party thuneitu sang National Core Committee (NCC) nimina ṭhukhawm chuan Covid-19 leng mek avangin block hruaitu tur thlang loa ruat nise, an ti.

MNF NCC an party president Zoramthanga hoa ṭhukhawm chuan, "Tun thlengin Covid 19 hripui leng nen kan la inchiahpiah mek zel avangin MNF block inthlanna buatsaih pawh a hun tawh viau nain, tun ang dinhmunah chuan inthlanna buatsaih chiah kan ngai lo. MNF dan buin NCC thuneihna a pek angin, block hruaitu turte chu a ruata inruat thar mai nise," an ti.

Meeting chuan Covid-19 dona atana sorkar hmalak dan ṭha an ti a, "Pathian zarah hripui avanga nunna chan kan la awm lo leh India rampum huap pawha Covid-19 dona-a ti ṭha ber state kan han ni te hi lawmawm kan ti," an ti a, mipuite ṭanrualna leh thuawihna avang leh nasa taka Pathian hnena kan ṭawngṭai min chhanna a nih thu an tarlang.

MNF NCC chuan NGO, damdawi lam thiam association, private hospital, task force, police, doctor leh nurse ho inthurualna avanga hetiang dinhmun thleng theiah an ngai a, an zavaia chungah lawmthu an sawi.