Hindi zirtirtu bàn tawh mi 1,305-te aṭanga mi 665 la turin sorkar ngen

Mizoram CSS Hindi Teacher Association (MCHTA) chuan, Mizoram sorkarin Centrally sponsored scheme (CSS) Hindi zirtirtu 665 a lâk thar tur chu CSS hnuaia Hindi zirtirtu lo ni tawh, sorkarin a bàn tâk mi 1,305 aṭanga la turin sorkar an phût.

MCHTA-in nimina thuchhuah siama an tarlan danin, CSS Hindi teacher ni tawh leh tuna bàn tawh mi 1,305-te chu February 18, 2011-ah an thawk ṭan a, February 29, 2017-ah bàn an ni. An thawh leh theih nan hma an la a, sorkar laipui hotute dawrin Delhi-ah vawi eng emaw zat kal a, union minister-te pawh an hmu tawh a ni.

Tuna CSS hnuaia Hindi zirtirtu 665 lâk tur chu a hmaaa MCHTA-in sum an thawh khawm tam tak sénga an hmalakna leh state sorkar hmalakna rah chhuahah an ngai. CSS hnuaiah hian Hindi teacher 665 lakna phalna Mizoram sorkarin a hmu a, lakna turin advertisement pawh chhuah a ni tawh.

MCHTA chuan, CSS hnuaia Hindi teacher 665 lâk turah a hmaa ban tawh mi 1,305-te ngai pawimawh tura sorkar ngenin, "CSS Hindi teacher mi 1,305-te aṭang ngeia hnawhkhat turin sorkar kan phût. Kan thawh chhungin training phalsak ve loh kan nih avanga heng kan zirtirtu 1,305 aṭanga la train lote pawhin post 665 lâk turah kan dil ve theihna turin hriatthiamna awm ngei turah kan ngai a ni," an ti.

Hindi teacher 665 lâk turah ‘trained' ni lo, Hindi Training College-a la zir mekte pawh sorkarin dil a phalsak thei a nih chuan, kum 6 chuang CSS hnuaia thawk tawhte, an thawh laia training phalsak si lohte chu dil ve phalsak ngei turin sorkar an ngen a ni.

MCHTA tarlan danin, kum 2018-a MLA inthlanpui dáwnah tuna Chief Minister-in a sawm angin MCHTA hruaitute an léng a, an party-in MCHTA puihna an mamawh thu a sawi a ni. Tuna School Education Minister pawhin MCHTA hruaitute phone-in a bia a, theihtawp chhuahpui turin a ngen a, 'Train lote pawh Hindi teacher lak hunah relaxation pek in ni ang,' tiin a lo thlamuan a ni. Tuna Deputy CM pawhin, 'CSS Hindi teacher mi 1,305-te chu kan auhla ber alawm,' tiin a hrilh bawk.