Sum dinhmun kan siamṭhat loh chuan kan dinhmun a chhe lutuk dawn - CM
Nimin Assembly session-ah kum 2024-2025 budget sawiho a ni a, sawihona khartu Finance minister Lalduhoma, chief minister chuan sum dinhmun siamṭhat a nih loh chuan Mizoram dinhmun a chhiat lutuk dawn thu a sawi.
Chief Minister chuan capital expenditure tam se an duh tih sawiin, "Chutihrualin, kan sum hmuh a tam chuang si loa, kan revenue expenditure hi pung a ni lo. Kan hmuh a tam avangin a pung. Tin, sorkar hnathawk hlawh hi kum tin a pung ve zel a, muster roll eng emaw zat provisional employee-ah hlankai an ni. Pension an pung chho zel. Sorkar hnathawk hlawh leh pension hlawh atan hian kan budget aṭangin 45% vel a kal ral nghal," a ti.
Tui bill, buhfai mante a pung chho zel tih sawiin Lalduhoma chuan, "Administrative expenditure-te a sang zel. Sorkar kaltain sikul eng emaw zat dinhmun sangah a hlangkai. Chuvangin, kan revenue expenditure hi a sang lo thei lo. Páwng tihhniam ngawt theih a ni lo," a ti a, tupawh sorkar se revenue expenditure a sàn zel tur thu a sawi.
Chief Minister chuan, capital expenditure tlakhniam chhan ber chu year of consolidation an puan vang leh inrenchemna an kalpui vang a nih thu sawiin, "Kan capital expenditure hi cheng vbc. 686 in a tlahniam. A chhan dang chu kan opening balance hi cheng vbc. -389 a ni. Sorkar kaltain cheng khatmah min hnutchhiah lo mai ni loin, cheng vbc. -389 hi kan opening balance a ni zawk," a ti.
Lalduhoma chuan Mizoramin leiba a ngah thu sawiin, "Leiba cheng vbc. 13,584 min hnutchhiah a, hei hi tel lo se leiba ngah ber kan ni lo. Kan leiba hi pe vek ta ila, kan budget aṭangin 97% a kal ral dawn. Sorkar hnathawk thla khat hlawh pek tur pawh kan nei lo ang. Chuti khawpa leiba chu kan chhawm a, kan tih tlem ngawt theih a ni lo. Kan pûk ve tur, danin a phal sate kan nei ve," a ti a, leiba a pun loh theih loh thu a sawi.
RBI statement aṭanga a lan danin, kum 2021, 2022 leh 2023-ah Mizoram chu India rama leiba ngah ber a nih thu sawiin Chief Minister chuan, "Kum thum a zawnin leiba ngah ber kan ni tawh. Sorkar kum kal mekah pûk an tum chu cheng vbc. 3,246.71 a ni. Keini chuan hetiang zat zat pûk kan tum lo, kan pûk tum zat chu cheng vbc. 1,992.03 a ni," a ti.
Chief Minister chuan leiba rulh dan ngaihtuah a ngaih thu sawiin, "Kan pûk belh zel chuan kan la chhe mai dawn. Kan tih duhte ti lo ila, mipuite pawhin kum khat chhung chu min hrethiam se kan ti a ni. Sum dinhmun siamṭhat a ngai," a ti a, sum dinhmun siamṭha loa pûk belh zel a nih chuan Mizoram dinhmun a chhe lutuk dawn niin a sawi.
CM thusawi tlangpui
◆ Sorkar hnathawk hlawh leh pensioner hlawh atan kan budget aṭangin 45% a kal.
◆ Kan capital expenditure tlakhniam chhan ber chu year of consolidation puan vang leh inrenchemna kalpui vang.
◆ Sorkar kaltain cheng khatmah min hnutchhiah lo mai ni loin, kan opening balance chu cheng vbc. -389.
◆ Leiba cheng vbc. 13,585 hnutchhiah kan ni.
◆ Kum thum a zawnin leiba ngah ber kan ni.