Ruihhlo vangin kan ram dinhmun a ṭha lo; Dinhmun ziaawm lam kan pan thei - Excise Minister

Excise & Narcotics minister Lalnghinglova Hmar chuan ZPM member Baryl Van­neih­sangi zawhna chhangin, ruihhlo chungchangah Mizoram dinhmun a ṭhat loh thu a sawi a, "Dinhmun ziaawm lam erawh kan pan thei," a ti.

Lalnghinglova Hmar chuan, Mizoramah ruihhlo man tur a la tam hle tih sawiin, "Kan man tam hian kan hlawhtling nge tling lo tih hriatthiam a har. Man a tam dan aṭangin a la rêm lo tih a chiang. Kan ram dinhmun a ṭha lo, a dik tak sawi mai hi a ṭha," a ti a, kohhran leh tlawmngai pawlte'n sorkar an puih a, sorkarin theihtawp a chhuah chuan Mizoramin dinhmun ziaawm lam a pan theih thu a sawi.

Hetihlai hian Excise Minister chuan tual­chhunga ruihhlo che vel erawh a pung lo tih sawiin, "Manipur buai avangin Manipur kaltlanga ruihhlo kal ṭhin kha Mizoramah a rawn kaltlang a, ruihhlo man a tam phah. Ruihhlo do beihpui thlak a nih avangin ruihhlo man a pung hle. Ruihhlo man (rate) a sang hian ruihhlo a tlem deuh deuh tih a tilang," a ti.

Lalnghinglova Hmar chuan, dan angin Excise dept.-a thawktute transfer mek an nih thu sawiin, "Danah hmun ngaia an awm theih chin a awm vek. Kan man turte nen innel palh lutukte a awm palh thei. Chuvangin, dan angin kan kal phawt a ni. Insawipuite pawh a awm a, dan anga kal phawt ṭha kan ti," a ti a, in transfer hi in rinhlelh vang a nih loh thu a sawi.

Excise Minister chuan an department-ah kohhran leh khawtlang hruaitu an tam thu sawiin, "Mah se, an nihna hmasa chu Excise a ni. Hengte hi an awmna tharah pawh kohhran leh khawtlang tana ṭangkai tak an ni zui thei," a ti.

ZPM member W Chhuanawma zawhna chhangin Excise Minister chuan, ruihhlo dona kawnga an hmalakna hrang hrangte House a hrilh.

Excise Minister sawite
▶ Department-a thawktute fuihthar an ni. An hmanraw neih leh an thiamna/theihnate ṭangkai zawka hmang tura fuih an ni.
▶ District tinah ruihhlo dotu bík tur narcotic cell tihchangtlun bakah, district thar pathumahte pawh station din tura hmalak mek a ni.
▶ Kohhran ṭhalai hruaitute nen ruihhlo do ho dan tur sawiin inràwnkhawmna neih a ni.
▶ Central YMA executive committee nen ruihhlo do ho dan tur sawiin, inkawmhona neih a ni.
▶ Hnathawktu lâk belh leh hmanruate thuam ṭha tura hmalak mek a ni.