MZP bultumin Zoram Ni hman a ni : Mizoram tihmasawn turin kan ṭang ang - HM

Mizo Zirlai Pawl (MZP) chuan nimin khan School Education Directorate conference hall-ah March 5, 1966-a India sorkarin bomb hmanga Mizoram a beih champha, 'Zoram Ni' an hmang a; Home minister K Sapdanga'n hmanpuiin, "Kan hma lamah Mizoram tihmasawn zel turin kan ṭang ang," a ti.

K Sapdanga chuan, rambuai laiin khatih laia India sorkar khan jet fighter hmangin Mizoram a bei tih a mah ngeiin Champhaia an awm laiin a tawn thu a sawi a, "Titi nikhuaah jetfighter a hmang lo ti pawl an awm hian ka sa ve phat zel. Zoram Ni lo chhuahna hi a lungchhiat zawng leh thinrim zawnga sawi dawn chuan sawi tur tam tak a awm," a ti a, a thinrim zawng ringawta sawi chu kan hlawkpui loh thu a sawi.

Kan pi leh pute tawrhna kha ṭhangtharten hrereng chungin, kan rilru put hmangah kha chhiatna kha engtin nge hmasawnna atan kan hman theih ang tih rilru put a pawimawh tih sawiin Home Minister chuan, "Kan hma lamah Mizoram tihmasawn zel turin kan ṭang ang," a ti a; zirlaite chu zau zawka rilru pu tur leh sorkar finchhuah ṭhin turin a sawm.

MZP president H Lalthianghlima pawhin thusawiin, "Ram leh hnamin hun harsa a tawh hi theihnghilh mai chi a ni loa, phuba lak tumna leh thinrim tharthawhna tur ni loin, hnam anga ṭanrualna leh inpumkhatna ni atan hmang ang u. Zofate kan lo inlungrual a, kan inpumkhat hi kan hnam dinchhuahna tura thil pawimawh a ni," a ti.

Kumin Zoram Ni thupui chu 'Zofate insuihkhâwmna hmathlir' tih a ni a; PUC asst. professor Dr Vanlalremruata Tonson-in paper a buatsaih chu zirho niin, college hrang hrang zirlaite, political party leh NGO hrang hrang aiawhte an tel.