Kan sakhua a him zel theihna atan thi leh thau pawlha kan ṭan a ngai - MPCC President

6th March, 2024

Mizoram Pradesh Congress Committee (MPCC) president Lal Thanzara chuan nimin khan Aizawl Press Club-ah thuthar thehdarhtute a kawm a, "Kan sakhua, kan Kristian-na a him zel theih nan thi leh thau pawlha kan ṭan a ngai ta tak meuh meuh," a ti.

Lal Thanzara chuan, Mizo Kristiante ṭanrual a ngaih thu sawiin, "Ni tinin nekchepna kan hmachhawn nasa tual tual a, BJP hian Kristiante hi min ngaithei loa, India pakhat, culture pakhat, sakhua pakhat tih chu an auhla a ni. Hindu sakhuaa inchhunglut vek turin min duh tihna a ni ber mai. Central-a BJP sorkar paihthla tur hian Congress Party chuan Mizoram Secular Force a dina, political party hrang hrangte, NGO te, kohhran hrang hrangte lo tel turin kan sawm vek che u," a ti a, kan sakhua, kan Kristian-na a him zel theih nan thi leh thau pawlha kan ṭan a ngai ta tak meuh meuh thu a sawi.

Central-a sorkarna chelh mektu BJP sorkarin hnam tenau zawk leh sakhaw tenau zawkte dimna nei miah loa dan hmanga a sawisa ṭhin chu tihbo a ṭul thu sawiin MPCC President chuan, "CAA hmang te, UCC hmangte, Anti Conversion Act hmangtea Kristiante min bei chamchi mai hi tihtawp a ngai a, kan titawp lo a nih chuan kan la ral mai ang tih a hlauhawm. Kan ram danpui, Constitution-a secularism paihbo an tum hi Kristiante tihchhiat vek an tumna hmanrua a ni a. Chuvangin, kan ṭanrual a ngai. India ramah a kum telin Kristiante nekchepna a nasa tial tial," a ti.

MPCC President thusawi ṭhenkhat

☑ BJP chuan kum 2019 Lok Sabha inthlan dawna an election manifesto-ah, India rama CAB hman te, UCC hman te, Muslim temple awmna Ayodhya rama Ram Temple sakte an tiam.

☑ Union Home Minister chuan February 10, 2024 khan CAA chu kum 2024 Lok Sabha inthlan hmain hman tum a nih thu a sawi a; an hman chuan Bangladesh-a Hindu leh Buddhist maktaduai tel awm tan khuan kan rama rawn luh a ti awlsam dawn a, kan tuar hle thei dawn.

☑ Modi-a lal hnu aṭangin Kristiante tihduhdahna a hluar ṭana, kum 2016 khan tihduhdahna vawi 330 a thlenga, kum 2017-ah vawi 440, kum 2018-ah vawi 477, kum 2019-ah vawi 527 leh kum 2022-ah vawi 599 a thleng.

☑ Ministry of Home-in Myanmar nena awlsam taka kan inkalpawhna free movement regime min paihsak a tum leh ramri hung a tum hi kan duh lo takzet a, theihtawpa do zel kan tum.