KHAWTHLIR

PYD-in thisen pe

UPC-NEI hnuaia Aizawl East District Bazar Bial PYD-te chuan nimin khan Civil Hospital, Aizawl Blood Bank-ah bial PYD inkhawmpui rorel bawhzuiin thisen unit 41 an pe a, thisen hi mipa 29 leh hmeichhia 12-in an pe a ni.

Zu zawrh tum lo

MNF member R Rohmingliana zawhna chhangin Excise & Narcotics minister Lalnghinglova Hmar chuan, tun dinhmunah sorkarin zu zawrh tumna a neih hriat a nih loh thu House a hrilh.

Mibo thiin hmu

February 26, 2024 zan dar 8:30 aṭanga an chenna in aṭanga a chhuah hnua hmuhzui tak loh Lalropuia (39) s/o HK Zova, Kolasib Salem Veng, tuna Maubawk Veng, Aizawla khawsa mek chu Lawipu Veng, Tlawng road kawng thlang metre 100 velah thia hmuh a ni. Lalropuia hi ni sarih zawn a nih hnuah pawh hmuh a nih loh avangin March 4, Thawhṭanni tlai khan CYMA bultumin a nawlpuia zawn kharna hun hman a ni a, nimin khan mi tlawmngai ṭhenkhatten zawn chhunzawmin, nimin chhun dar 11:55 khan a ruang an hmu.

In saksak

Khawzawl Vengthar Branch YMA chuan tunlai hian an veng chhunga hmeithai pakhat chenna in tur an sak sak. In an sak sak hian Housing for All scheme aṭangin in sak ṭanpuina Rs. 60,000 a dawng a, in a sak puitlin theih a inrin loh avangin YMA hi bèlin, anni hian hnatlangin an sak sak ta a ni. A pawisa dawn hian a daih dawn loh avangin khawtlangah a remchan dan angin vehbur an khawn dawn.

In kàng

Nimin zing dar 4 vel khan Zasangi in, Vaivakawn, Aizawla mi; PC Lianzikate'n bungraw dahna atana an luah Assam type chhawng hnih chu bungraw chuh hman lohin a kang ral. Kangmei chhuahna bulah hian high school a awm a, HSLC exam hmachhawn mek sikula camp-te chuan kangmei chhuak hi hriain an theih ang angin an ṭhelh a, Fire department pawhin an hriat veleh kangmei chhuahna hmun hi panin, zing dar 5:30 velah an ṭhelh mit. A bul chiaha in pakhat kawngkapui, ventilation leh khum pakhat a kang chhe hman.

Khawhai-Lungtan WSS

Khawhai khua leh Lungtan khuate tui lakna tur, Khawhai-Lungtan Water Supply Scheme (Solar Pumping) chu nimin khan PHE Champhai WATSAN Circle SE Thanchungnunga'n a tlawh a; contractor leh site engineer-te kawmin, hun bituk chhunga hna zo hman tur leh ṭha taka hna thawk turin a fuih. Ni khata tui litres 2,55,000 pump chhuak thei tur Khawhai-Lungtan Water Supply Scheme hi NABARD sum cheng vbc 25 hmanga thawh mek a ni.

MCC hawng

Siaha district bawrhsap Lalhmunsanga Hnamte chuan nimin khan Siaha New Colony II-a Labour, Employment, Skill Development and Entrepreneurship (LESDE) pisaah hna zawngtute pui tur leh hna zawngtu leh hna thawh tur neite inkara palai hna thawktu tur, Model Career Centre (MCC) a hawng.

Inzirtirna buatsaih

Lawngtlai District Election Office leh National Service Scheme (NSS), Govt. Lawngtlai College ṭawngkawp chuan nimin khan Lawngtlai Collage-ah kum 18 tling thar mai tur te leh tling tawh, electoral roll-a hming la ziak lut lote'n Lok Sabha MP inthlanah vote an thlak theih nan thil pawimawh inzirtrina hun, ‘Mera Pehla Vote, Desh Ke Liye’ an buatsaih a, Lawngtlai addl. DC Abraham Beirazi Khithie-in a hmanpui.

Nei turin ngen

Aizawl district bawrhsap Nazuk Kumar chuan mipuite’n chawpchilh taka document pawimawh - tribal certificate, residential certificate, income certificate-te an dil a ngaih lohna turin mahni lo inhmakhua a, heng document/certificate-te hi lo nei lâwk turin a ngen a; Aizawl DC Office bakah, Common Service Centre (CSC) hrang hrangahte dil theih a nih thu a tarlang.